ԵՐԵՎԱՆ, 4 հունիսի – Sputnik.Վաղը` հունիսի 5–ին, «Դիմադրություն» շարժման հանրահավաք և երթ չի լինելու։ Ֆրանսիայի հրապարակում հանրահավաքի ժամանակ այս մասին հայտարարեց «Դիմադրություն» շարժման անդամ, ԱԺ փոխնախագահ, «Հայաստան» խմբակցության պատգամավոր Իշխան Սաղաթելյանը։
«Վաղն այստեղ տարբեր թեմաներով քննարկումներ կանցկացնենք, կխոսենք մեր ծրագրերի մասին։ Ավելի ուշ կհրապարակենք ժամը, որպեսզի մեր այն քաղաքացիները, որոնք ուզում են գալ, ներկա լինեն»,–ասաց Սաղաթելյանը։
Նա հավելեց, որ վաղը կքննարկեն նաև հաջորդ շաբաթվա անելիքները։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։