ԵՐԵՎԱՆ, 3 հունիսի – Sputnik. Ռուսաստանի ԱԳՆ-ն Կանադայի 41 քաղաքացու է ներառել «սև ցուցակում», նրանց թվում են Ուկրաինայում ազգայնականներին աջակցող կազմակերպությունների ղեկավարները և զինվորական պաշտոնյաները: Տեղեկությունը հրապարակվել է ՌուսաստանիԱԳՆ-ի կայքում։
«Ի պատասխան հերթական հակառուսական անձնական պատժամիջոցների, որոնց մասին պաշտոնական Օտտավան հայտարարել էր մայիսի 8-ին, Ռուսաստանի պաշտպանության նախարարության ղեկավարության, զորահրամանատարների ու գործարար շրջանակների ներկայացուցիչների դեմ, մշտական հիմունքներով փակվում է Ռուսաստանի մուտքը Կանադայի որոշ կազմակերպությունների ղեկավարների համար, որոնք աջակցում են Ուկրաինայում ծայրահեղ ազգայնական ուժերին, ինչպես նաև բարձրագույն զինվորական պաշտոնյաների», - նշված է հաղորդագրության մեջ:
ՌԴ ԱԳՆ-ի կայքում նաև նշվում է 41 քաղաքացիների անուններով ցանկը, որոնց մուտքը ՌԴ տարածք անժամկետ արգելված է:
Ավելի վաղ ՌԴ ԱԳՆ-ն հրապարակել էր Կանադայի քաղաքացիների ցանկը, որոնց մուտքը Ռուսաստան մշտական հիմունքներով փակ է:
Ցուցակում ընդգրկված է 592 մարդ, այդ թվում՝ Կանադայի խորհրդարանի սենատորներ, խորհրդարանի համայնքների պալատի անդամներ լիբերալ ու պահպանողական կուսակցություններից, հրապարակախոսներ, Օտտավայի քաղաքապետ Ջիմ Ուոթսոնը, Տորոնտոյի քաղաքապետ Ջոն Թորին, Կանադայի արդարադատության նախարարն ու գլխավոր դատախազ Դևիդ Լամետին, Կանադայի նախկին վարչապետ Սթիվեն Հարփերը և այլ մարդիկ։
Ռուսական կողմը ստիպված է նմանկարգի պատժամիջոցներ կիրառվում բացառապես Կանադայի ղեկավարության թշնամական գործողություններին արձագանքելու համար։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ-ն ու ԴԺՀ-ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողությունները շարունակվում են արդեն 100-րդ օրը։