ԵՐԵՎԱՆ, 3 հունիսի – Sputnik. Մոսկվան ուսումնասիրում է գործընկերների հետ գազից բացի նաև այլ ապրանքների` ռուբլով վճարման հնարավորությունը։ Այս մասին այսօր հրավիրված ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Ինչպես ցույց է տալիս ռուսական գազի դիմաց վճարումների պրակտիկան, մեր գործընկերների մեծ մասը համաձայնվել է փոխգործակցության նոր ձևաչափի հետ... Ինչ վերաբերում է ռուբլով վճարումների ոլորտն ընդլայնելուն ռուսական ապրանքների որոշ կատեգորիաների համար, ապա նման տարբերակներ մշտապես դիտարկվում են», – ասել է նա։
Զախարովայի խոսքով` Մոսկվան կասկած չունի, որ «Արևմուտքը կշարունակի չարաշահել միջազգային և ֆինանսական համակարգերում ունեցած իր դիրքը»։
«Սթափ նայելու դեպքում, կարելի է ասել, պարզապես կշարունակի շահարկումներն այդ ոլորտում` շանտաժի և սպառնալիքների տարրեր կիրառելով»,– նշել է ՌԴ ԱԳՆ պաշտոնական ներկայացուցիչը։
Զախարովան հայտարարել է նաև, որ Ռուսաստանը մտադիր է աշխատել իր հիմնական գործընկերների հետ առևտրատնտեսական և ներդրումային հարաբերություններում ազգային արժույթների մասնաբաժինն ավելացնելու ուղղությամբ։
Հիշեցնենք` Ռուսաստանի նախագահ Վլադիմիր Պուտինը մարտի 23-ին հայտարարեց, որ ԵՄ երկրներն ու Ռուսաստանի դեմ պատժամիջոցներ սահմանած այլ պետությունները գազի մատակարարման դիմաց պետք է վճարեն ռուբլով: Այնուհետ նա ստորագրեց համապատասխան հրամանագիրը և տեղեկացրեց, որ եթե ապրիլի 1-ից ոչ բարեկամական երկրները ռուբլով չվճարեն, ապա Ռուսաստանը դա կհամարի գազային պայմանագրերի գծով պարտավորությունների չկատարում:
Նոր սխեմայի համաձայն` «Գազպրոմբանկը» արտարժույթով և ռուբլով հատուկ հաշիվներ է բացում արտասահմանյան գնորդների հետ գազի դիմաց հաշվարկների համար: Գնորդը կկարողանա միջոցները առաջին հաշվին փոխանցել «երկնագույն վառելիքի» մատակարարման պայմանագրում նշված արժույթով, բանկը այն կվաճառի մոսկովյան բորսայում, ինչից հետո ռուբլին կփոխանցի գազի գնորդի հաշվին, և արդեն դրանից կվճարվի գազի մատակարարին՝ «Գազպրոմին»: