ԵՐԵՎԱՆ, 3 հունիսի – Sputnik. Ուկրաինայում ՌԴ հատուկ գործողությունները կշարունակվեն այնքան ժամանակ, մինչև դրա բոլոր նպատակները չիրագործվեն։ Այս մասին, ՌԻԱ Նովոստիի փոխանցմամբ, հայտարարել է ՌԴ նախագահի մամուլի քարտուղար Դմիտրի Պեսկովը։
Նրա խոսքով` հիմնական խնդիրը ԼԺՀ–ի և ԴԺՀ–ի բնակիչների պաշտպանությունն է։ Այդ առումով միջոցներ են ձեռնարկվում «ազգայնական տրամադրվածություն ունեցող Ուկրաինայի զինված ուժերի, ինչպես նաև անմիջական ազգայնական տարրերի» նկատմամբ, որոշակի արդյունքներ արդեն ձեռք են բերվել։
«Ազատագրվել են մի շարք բնակավայրեր, խաղաղ կյանքի վերադառնալու հնարավորություն է ստեղծվել մարդկանց համար, այդ աշխատանքները կշարունակվեն, քանի դեռ չեն իրագործվել ռազմական հատուկ գործողությունների բոլոր նպատակները», – ասել է Պեսկովը` պատասխանելով լրագրողների հարցին։
ՌԴ–ի կազմում Դոնբասի ներառման մասին հանրաքվեի անցկացման ժամկետները մեկնաբանելիս Պեսկովն ասել է, որ «այդ հարցում դեռ հստակություն չկա»։
Նախագահի ներկայացուցիչը հավելել է, որ հստակություն հանրաքվեի ժամկետների առումով կլինի դրանց անցկացման պայմանները պարզաբանելուն զուգընթաց։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 100-րդ օրը։