ԵՐԵՎԱՆ, 3 հունիսի – Sputnik. Մենք գնում ենք ոչ թե խորհրդարան, այլ կառավարություն։ Երևանի Ֆրանսիայի հրապարակում ընթացող հանրահավաքում հայտարարեց «Դիմադրություն» շարժման անդամ, ԱԺ փոխնախագահ, «Հայաստան» խմբակցության պատգամավոր Իշխան Սաղաթելյանը` անդրադառնալով ԱԺ իշխող խմբակցության տապալած ԱԺ նիստին։
Իշխան Սաղաթելյան
© Sputnik / Aram Nersesyan
«Գնում ենք կառավարություն` մոտիկից, հստակ ներկայցնելու մեր պահանջները»,- ասաց Սաղաթելյանը` Ֆրանսիայի հրապարակում հավաքվածներին կոչ անելով միանալ երթին։
«Մենք խորհրդարան ներկայացրինք մի փաստաթուղթ, որտեղ արտացոլված են հայ ժողովրդի կենսական շահերը ներկայացնող մինիմալ սկզբունքներն ու պահանջները։ Հերթական շանսը տվեցինք իշխող ուժին, որ խելքի գան, որ հասկանան, որ ժողովուրդն իրենց թույլ չի տալու երկիրը տանել նոր կապիտուլյացիայի։ Չհասկացան»,- ասաց Սաղաթելյանը։
Ընդդիմադիր գործիչը շեշտեց, որ փաստաթղթում ո՛չ հրաժարականի պահանջ կար, ո՛չ էլ անդրադարձ երկրի ներքաղաքական հարցերին։
«Ինչ էինք ասում. ասում էինք` եկե՛ք, փաստե՛ք, որ դուք չեք ուզում, որ Արցախը մնա Ադրբեջանի կազմում, եկե՛ք, փաստե՛ք, որ դուք ուզում եք` մենք պետականություն ունենանք, եկե՛ք փաստե՛ք, որ դուք հայ ժողովրդի ներքին թշնամիները չեք։ Չեկան։ Նիստը տապալեցին»,– ասաց Սաղաթելյանը` միաժամանակ հշեցնելով, որ ԱԺ նիստի գրանցումը դեռ բաց է, և իշխանական պատգամավորները դեռ հնարավորություն ունեն գրանցվելու։
Իշխան Սաղաթելյանի ելույթից հետո երթը մեկնարկեց։
Հիշեցնենք` այսօր 16։00-ին հրավիրված ԱԺ արտահերթ նիստը հետաձգվեց 4 ժամով` քվորում չլինելու պատճառով։
Նիստին գրանցվել էր 33 պատգամավոր։
ԱԺ կանոնակարգ օրենքի համաձայն` գրանցումը մնում է բաց ու շարունակվում մինչև անհրաժեշտ թվով պատգամավորների գրանցումը, բայց ոչ ավել, քան 4 ժամ։
4 ժամ անց քվորում չապահովելու դեպքում նիստը հայտարարվում է չկայացած։