ԵՐԵՎԱՆ, 3 հունիսի – Sputnik. Հայաստանում սպասվում է պատմամշակութային արգելոց-թանգարանների մուտքավճարների փոփոխություն: Լրագրողների հետ հրավիրված ասուլիսում հայտարարեց «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արմեն Հովհաննիսյանը։
Նրա խոսքով` մուտքավճարների վերանայման նախնական ժամկետ է դիտարկվում 2023 թվականը:
«Երբ կարգավիճակը հուշարձանից փոխվում է արգելոցի, այնտեղ մաքրությունը, պահպանության ապահովումը պատշաճ իրականացնելու համար ավելանում են նոր աշխատատեղեր: Արտաբյուջե պետք է ունենանք, որ կարողանանք պատշաճ ապահովել մաքրությունը, տարածքի բարեկարգումը»,- ասաց Հովհաննիսյանը:
Իր հերթին ՀՀ ԿԳՄՍ նախարարության պատմության և մշակույթի հուշարձանների պահպանության վարչության պետ Հարություն Վանյանը նշեց, որ ՊՈԱԿ-ին պետական ֆինանսավորումը տրվում է որոշակի հաստիքների չափով:
Օրինակ՝ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ն ամեն մարզում ունի 15-20 աշխատող, որոնք իրականացնում են շրջայցեր, մոնիթորինգ և այլ աշխատանքներ:
Պատասխանատուները նշում են, որ նախ եղած ռեսուրսը քիչ է և չի բավականացնում աշխատանքը պատշաճ կազմակերպելու համար, դրանից բացի, աշխատողների վարձատրությունն է բավական ցածր:
«Գումարը գեներացվում է նաև արտաբյուջեից, դա էլ իր հերթին գեներացվում է արգելոց-թանգարանների տոմսերից, այնտեղ իրականացվող միջոցառումներից, նկարահանումներից: Բյուջեի հիմնական մասն ապահովում են Գառնին, Զվարթնոցը, Ամբերդը, այլ հուշարձաններ, որոնք տարիների ընթացքում անցել են տոմսային համակարգի: Եթե մենք ուզում ենք ունենալ մասնագիտորեն լավ պատրաստված հուշարձանի պահապան, որը պահակի դեր չխաղա, հետևաբար պետք է վերանայենք ֆինանսավորումը: Ես չեմ ուզում նվիրյալ աշխատողների որակները ցածրացնել, բայց նրանց վարձատրել է պետք: Դրանից բացի, բարեկարգման, վերականգման աշխատանքներ է անհրաժեշտ իրականացնել»,- ասաց նա:
Օրերս տեղեկություն հրապարակվեց, ըստ որի, «Քարահունջ» բնակատեղի պատմամշակութային արգելոցի մուտքը հունիսի 1-ից կլինի վճարովի, որը հանրության շրջանում միանշանակ չընդունվեց:
Անդրադառնալով մուտքի վճարի սահմանմանը՝ Հովհաննիսյանը նշեց, որ չնայած որոշումը շատ քննադատվեց, սակայն պետք է հասկանալ, որ այդ գումարները հիմնականում ուղղվում են հենց պահպանությանը, տարածքների բարեկարգմանը: