Հայաստանի և Ադրբեջանի երիտասարդները կհանդիպեն Ստրասբուրգում. դեսպան

ԵՐԵՎԱՆ, 3 հունիսի – Sputnik. Հաջորդ շաբաթ Ստրասբուրգում տեղի կունենա հայ և ադրբեջանցի երիտասարդ սերնդի ներկայացուցիչների հանդիպումը։ Նման հայտարարություն է արել Ադրբեջանում Ֆրանսիայի դեսպան Զաքարի Գրոսը, փոխանցում է ՌԻԱ Նովոստին։

Նրա խոսքով, «այդ նախաձեռնությունը քննարկվել է Բրյուսելում և համաձայնեցվել է Հայաստանի և Ադրբեջանի ղեկավարների նախորդ տարվա դեկտեմբերին կայացած հանդիպմանը»։

Ընդհանուր առմամբ, Ստրասբուրգ կմեկնեն Ադրբեջանի 10 ներկայացուցիչներ։

Մայիսի 22-ին Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի միջև տեղի ունեցած հանդիպումից հետո Փաշինյանը և Ալիևը հանձնարարել են իրենց արտաքին գործերի նախարարություններին սկսել խաղաղ բանակցությունների նախապատրաստումը Երևանի և Բաքվի միջև։

Մայիսի 24-ին հայ-ադրբեջանական միջպետական սահմանին կայացել է Հայաստանի փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի առաջին հանդիպումը՝ սահմանների սահմանազատման և անվտանգության հարցերով համատեղ հանձնաժողովի ձևաչափով։ Պայմանավորվածություն է ձեռք բերվել երկրորդ հանդիպումն անցկացնել Մոսկվայում (հունիսի 3-ին – խմբ.), երրորդը՝ Բրյուսելում։