ԵՐԵՎԱՆ, 3 հունիսի – Sputnik. ՀՀ առողջապահության նախարար Անահիտ Ավանեսյանն ու փոխնախարար Արմեն Նազարյանն այցելել են «Հերացի» թիվ 1 հիվանդանոցային համալիր, որտեղ, հիշեցնենք, գտնվում են այսօր ոստիկանության ու քաղաքացիների միջև տեղի ունեցած բախումներից տուժած բազմաթիվ քաղաքացիներ։
Նախարարությունը հայտնում է նաև, որ ժամը 22:30-ի դրությամբ տարբեր բժշկական կենտրոններ են դիմել 42 անձինք։ Նրանցից 22-ը ոստիկանության ծառայողներ են:
«Բոլորը գտնվում են հետազոտման փուլում: Նրանց առողջական վիճակի մասին լրացուցիչ կտեղեկացնենք»,– ասված է նախարարության հաղորդագրության մեջ։
«Հերացի» համալսարանական հիվանդանոցից էլ հայտնում են, որ ժամը 22:20-ի դրությամբ տվյալ ԲԿ է տեղափոխվել 27 քաղաքացի, որոնցից 21-ը` ոստիկան, 6-ը` քաղաքացիական անձիք։
Հայտնել էինք, որ այսօր ընդդիմադիրները բողոքի երթով գնացել էին կառավարական ամառանոցների մոտ, որտեղ ակցիա էին իրականացնում և պահանջում, որ վարչապետ Նիկոլ Փաշինյանը դուրս գա ու պատասխանի Արցախի կարգավիճակի վերաբերյալ իրենց հարցին։ Այնտեղ ոստիկանների և ցուցարարների միջև բախումներ եղան։
Մայիսի 25-ին հայտնի դարձավ, որ խորհրդարանական երկու ընդդիմադիր խմբակցությունները ՝ «Պատիվ ունեմ»-ը և «Հայաստանը», հանդես են եկել արտահերթ նիստ հրավիրելու նախաձեռնությամբ։ Նրանք առաջարկում են, որ ԱԺ-ն հայտարարությամբ հանդես գա, որում ի թիվս այլ դրույթների նշվի, որ Արցախը երբեք չի եղել ու չի լինելու Ադրբեջանի կազմում։
Այսօր արտահերթ նիստը չկայացավ` քվորում չլինելու պատճառով։ Ժամը 20։00-ին լրացավ ԱԺ արտահերթ նիստին գրանցվելու համար սահմանված առավելագույն 4 ժամը։ ԱԺ նախագահ Ալեն Սիմոնյանը ժամը 20։00-ին դատարկ դահլիճում հայտարարեց, որ ընդդիմության նախաձեռնած արտահերթ նիստը չի կարող կայանալ։