ԵՐԵՎԱՆ, 3 հունիսի – Sputnik. Ընդդիմության նախաձեռնած ԱԺ արտահերթ նիստը չկայացավ` անհրաժեշտ քվորում չլինելու հիմնավորմամբ։
Նիստին գրանցվելու համար հատկացված 4 ժամը լրացավ ժամը 20։00-ին։
ԱԺ նախագահ Ալեն Սիմոնյանը դատարկ դահլիճում հայտարարեց. «Հարգելի՛ հայրենակիցներ, 4 ժամը լրացավ, և փաստացի դահլիճում այս պահին պատգամավորներ չկան։ Չկան նաև ընդդիմության պատգամավորները, որոնք նախաձեռնությամբ էին հանդես եկել։ Փաստացի կարող ենք արձանագրել, որ նիստը չկայացավ։ Շնորհակալություն, այսօրվա նիստն էլ` այսպես»։
Հիշեցնենք` այսօր 16։00-ին նախանշված ԱԺ արտահերթ նիստը հետաձգվեց 4 ժամով` քվորում չլինելու պատճառով։
Նիստին գրանցվել էր 33 պատգամավոր։ Իշխանական խմբակցությունից ներկա էր միայն նիստը վարող ԱԺ նախագահ Ալեն Սիմոնյանը։
ԱԺ Կանոնակարգ օրենքի համաձայն` գրանցումը մնում է բաց ու շարունակվում մինչև անհրաժեշտ թվով պատգամավորների գրանցումը, բայց ոչ ավելի, քան 4 ժամ։
4 ժամ անց քվորում չապահովելու դեպքում, նիստը հայտարարվում է չկայացած։
Հիշեցնենք, որ նիստի օրակարգում ընդգրկված էր «Հայաստան» և «Պատիվ ունեմ» խմբակցությունների հեղինակած «Հայ-ադրբեջանական և հայ-թուրքական հարաբերությունների կապակցությամբ» ԱԺ հայտարարության նախագիծը: