ԵՐԵՎԱՆ, 2 հունիսի – Sputnik. «Հաղթանակ» թաղամասի բնակիչները կառավարության շենքի առջև բողոքի ակցիա են անում։ Նրանք պահանջում են ժառանգություն ստացած իրենց հողերի սեփականաշնորհման գործընթացը չձգձգել։
Կառավարությունը 1990-ականներին օգտագործման համար հող է հատկացրել նրանց, բայց հիմա սեփականության վկայականի տրամադրման հետ կապված խնդիրներ են առաջացել, և բնակիչները չեն կարողանում կառուցապատման կամ գյուղատնտեսական աշխատանքներ իրականացնել:
«Էդ հողերը սեփականաշնորհվեցին անկախության սկզբում, սեփականության ակտ էլ ունենք։ Հայրս ինձ ժառանգություն է տվել այդ հողը, բայց չեմ կարողանում ոչ մի ձևով տնօրինել, քանի որ հիմա ասում են` գյուղնշանակության հող է, ոչ մի թուղթ չեն տալիս մեզ։ Նույնիսկ մեզնից վերջին երկու տարիներին հարկ էլ չեն վերցնում։ Մարդ էլ իր հողը չկարողանա տնօրինե՞լ»,- ասաց ակցիայի մասնակիցներից մեկը։
Մեկ ուրիշն ավելացրեց, որ ինքն էլ է հողը ժառանգություն ստացել հորից, սակայն ո՛չ փաստաթուղթ են տալիս, որ դա իր սեփականությունն է, ո՛չ էլ գյուղվարկ, որ այդ տարածքում ինչ-ինչ աշխատանքներ անի։
«Երևանի քաղաքապետարան ենք դիմել շատ-շատ անգամներ, ու մեզ ասել են` կլուծենք հարցերը։ Իսկ թե երբ է մեր խնդիրը լուծվելու, չգիտենք։ Կառավարության անդամների հետ էլ հանդիպել ենք, կրկին ասել են` կլուծենք, բայց ժամանակն անցնում է»,- ասաց նա։
Ակցիայի մասնակիցները մտավախություն ունեն, որ մի օր կարող են ասել, որ այդ հողը տնօրինողն իրենք չեն։
Կառավարությունից հայտնեցին, որ հարցը կքննարկվի վարչապետի հսկողությամբ, և 15 օր հետո պատասխան կտան նրանց։ Ակցիայի մասնակիցները հայտարարեցին` եթե իրենց խնդրին լուծում չտրվի, ապա կսկսեն անհնազանդության ցույցեր անել անել, փողոց փակել։