ԵՐԵՎԱՆ, հունիսի 2 - Sputnik. Դոնբասի՝ ՌԴ-ի կազմի մեջ մտնելու մասին հանրաքվեի անցկացումը ներկայիս պայմաններում դժվար թե հնարավոր լինի։ Տեղեկությունը հայտնելէ ՌԴ նախագահի մամուլի քարտուղար Դմիտրի Պեսկովը։
Ավելի վաղ Պետդումայի միջազգային կոմիտեի ղեկավար, Ուկրաինայի հետ բանակցային խմբի անդամ և ՌԼԴԿ առաջնորդ Լեոնիդ Սլուցկին ՌԻԱ Նովոստիին տված հարցազրույցում ասել է, որ ԴԺՀ-ի, ԼԺՀ-ի ու Խերսոնի մարզի՝ ՌԴ-ի կազմի մեջ մտնելու շուրջ հանրաքվեն կարող է միաժամանակ անցկացվել արդեն հուլիսին:
«Կրեմլը հանրաքվեների վերաբերյալ որոշումներ կայացնողը չէ։ Մենք բազմիցս ասել ենք, որ իրենց ճակատագիրը պետք է որոշեն մարդիկ, որոնք ապրում են այդ տարածքներում։ Հենց իրենք։ Առաջինը՝ դա պետք է լինի այդ մարդկանց որոշումը։ Եվ երկրորդ՝ դրա համար անհրաժեշտ է, իհարկե, համապատասխան պայմաններ ստեղծել»,- ասել է Պեսկովը։
ՌԴ նախագահի մամուլի քարտուղարը նշել է, որ Կիևին զենքի մատակարարումը չի փոխում Ուկրաինայում ռուսական հատուկ գործողության չափանիշները, ՌԴ-ն հասնելու է դրա նպատակներին։ Պեսկովը վստահ է, որ Ռուսաստանի դեմ զենքի օգտագործումը միայն կխորացնի իրավիճակն ու ավելի շատ տառապանք կհասցնի Ուկրաինային։
«Ուկրաինային կշարունակեն զենք մատակարարել՝ ամենաժամանակակից զենքը։ Ես նախկինի պես չեմ ուզում խոսել բացարձակապես անցանկալի ու շատ տհաճ սցենարների մասին, երբ այդ զենքը հիպոթետիկորեն կփորձեն օգտագործել մեր տարածքում գտնվող թիրախների դեմ։ Դա էապես կփոխի իրավիճակը անբարենպաստ ուղղությամբ»,- ասել է Պուտինի մամուլի քարտուղարը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 99-րդ օրը։