ԵՐԵՎԱՆ, 1 հունիսի – Sputnik. Հանրահայտ ռեփեր 50 Cent–ը հայ երկրպագուներին ողջունել է Երևանում կայանալիք համերգի առիթով։ Տեսանյութը նա հրապարակել է սոցցանցերում։
«Ողջո՜ւյն, Հայաստա՛ն, ի՞նչ նորություն կա։ Անհամբեր սպասում եմ հայաստանյան ելույթիս։ Բաց չթողնե՛ք»,- ասել է հայտնի երաժիշտը։
Հիշեցնենք, որ համերգը կկայանա հուլիսի 1-ին «Հրազդան» մարզադաշտում։ Այն կանցկացվի HAYA փառատոնի շրջանակում։
Բացի այդ, Երևանում հանդես կգա նաև ֆրանսիացի հայտնի երգչուհի ZAZ-ը (հունիսի 25-ին), իսկ հուլիսի 9-ին կկայանա Led Zeppelin Symphonic նախագծի համերգը։ Բոլոր երեք միջոցառումներն էլ կկայանան «Հրազդան» մարզադաշտում։
Ռեփերի (որը նաև դերասան է, գրող, պրոդյուսեր և բռնցքամարտի փրոմոութեր) իրական անունը Քյորթիս Ջեյմս Ջեքսոն III է։ Համաշխարհային ճանաչում նա ստացել է Get Rich or Die Tryin’ և The Massacre ալբոմների թողարկումից հետո։ Նա հաջողության է հասել` վաճառելով դրանք ամբողջ աշխարհում ավելի քան 40 մլն օրինակով։