ԵՐԵՎԱՆ, 1 հունիսի -Sputnik. Ալբանիայի մայրաքաղաք Տիրանայում շարունակվող Եվրոպայի ծանրամարտի առաջնությունում Հայաստանը ներկայացնող Ռաֆիկ Հարությունյանը (81 կգ քաշային կարգում) երկամարտի 354 կգ արդյունքով հռչակվեց Եվրոպայի չեմպիոն։
Պոկում վարժությունում Ռաֆիկը 160 կգ արդյունքով արծաթե մեդալ նվաճեց, հրում վարժությունում նա 194 կգ արդյունք ցույց տվեց՝ շահելով ոսկե, և երկամարտում ևս ոսկե մեդալի արժանացավ։
Այսօրվա մեր մյուս մասնակից Կարեն Մարգարյանը զբաղեցրեց 4-րդ տեղը։
Հայաստանի տղամարդկանց հավաքականի կազմում Եվրոպայի առաջնությանը կմասնակցի ևս 8 ծանրորդ: Մեր երկրի մարզական պատիվը կպաշտպանեն նաև Անդրանիկ Կարապետյանը, Վարդան Մանուկյանը (89 կգ քաշային կարգ), Արա Աղանյանը, Դավիթ Հովհաննիսյանը (երկուսն էլ՝ 96 կգ), Սամվել Գասպարյանը (102 կգ քաշային կարգ), Արսեն Մարտիրոսյանը (109 կգ), Վարազդատ Լալայանը և Գոռ Մինասյանը (+109 կգ):
Կանանց հավաքականի կազմում 3 մարզուհիներ են ընդգրկված՝ Իզաբելլա Յալյանը (55 կգ), Տաթև Հակոբյանը (76 կգ) և Հռիփսիմե Խուրշուդյանը (87 կգ):
Հայաստանի թիմից առաջինը պայքարի մեջ է մտել Տոկիոյի oլիմպիական խաղերի մասնակից Իզաբելլա Յալյանը. նա երկամարտի 197 կգ արդյունքով (90 կգ + 107 կգ) զբաղեցրել է 5-րդ հորիզոնականը: