ԵՐԵՎԱՆ, 1 հունիսի – Sputnik. ՀՀ վերաքննիչ քրեական դատարանում ՀՀ վարչապետ Նիկոլ Փաշինյանի դեմ քրգործ չհարուցելու որոշման դեմ «Հայաստան» դաշինքի քարտուղար Արծվիկ Մինասյանի ու փաստաբան Հակոբ Մարտիրոսյանի բողոքի քննությունն այսուհետ կանցկացվի բաց ընթացակարգով։ Տեղեկությունն իր ֆեյսբուքյան էջում հայտնել է 44-օրյա պատերազմում զոհված Մենուա Հովհաննիսյանի մայրը` Կարին Տոնոյանը։
Հայտնել ենք, որ օրեր առաջ դատավոր Կարեն Բիշարյանը որոշել էր դռնփակ անցկացնել նիստերը, ծնողները բողոքարկել էին այդ որոշումը։
«Բողոքող կողմի միջնորդության արդյունքում չեղարկվեց, և որոշումն այսօր փոխվեց. հունիսի 3-ի դատական նիստն արդեն կանցկացվի դռնբաց: Մենք դեռևս ունենք 2 պահանջ` պահանջում ենք մեզ ներկայացնել համոզիչ հիմքեր` դատավոր Բիշարյանի նշանակման անկողմնակալության մասով: Ծնողներին շահագրգիռ կողմի կարգավիճակ տալ»,- գրել է Տոնոյանը։
Նա հույս է հայտնել, որ այս հարցերում նույնպես կհասնեն ցանկալի և արդարացի արդյունքի:
Հիշեցնենք` 2021 թվականի հունիսին Արծվիկ Մինասյանն ու Հակոբ Մարտիրոսյանը Փաշինյանի դեմ հանցագործության մասին հաղորդում են ներկայացրել` պահանջելով քրեական գործ հարուցել նրա կողմից կատարված առերևույթ պետական դավաճանության փաստով` ՀՀ-ի թշնամի պետության օգտին գործողություններ կատարելու առերևույթ հանգամանքներով։
Ներկայացված հաղորդումը քննության առարկա չի դարձել։ Դատախազությունը դրանից մի մասը` Շուշիի անկման և Արցախի հարավային ուղղությամբ կատարված իրադարձությունների վերաբերող հատվածը, առանձնացրել է և ուղարկել ԱԱԾ քննչական դեպարտամենտ՝ քրեական գործ հարուցելու, իսկ մյուս մասը ներկայացվել է ՀՔԾ (հետագայում` Հակակոռուպցիոն կոմիտե)՝ գեներալ Մովսես Հակոբյանի կողմից ասուլիսում արված հայտարարությունների հիման վրա հարուցված քրեական գործի շրջանակում քննելու համար։
Դատախազության կողմից հաղորդմանը պատշաճ կարգով ընթացք չտալու հանգամանքը դիմումատուները դիտարկել են որպես անգործություն ու այդ հիմքով նոր բողոք ներկայացրել դատարան։ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մերժել էր բողոքը, որից հետո դիմող կողմը Վերաքննիչ բողոք էր ներկայացրել։
Վերաքննիչ դատարանում ընթացող դատական նիստերը պարբերաբար հետաձգվում են, ինչը պատերազմի զոհերի ծնողների շրջանում բողոքի առիթ է դարձել։ Մայիսի 17-ին նիստի հերթական հետաձգումից հետո որդեկորույս ծնողները փակել էին Վերաքննիչ դատարանի հարակից փողոցը` օբյեկտիվ քննություն ու պատշաճ ընթացակարգ պահանջելով իրենց բողոքի վերաբերյալ։