ԵՐԵՎԱՆ, 1 հունիսի – Sputnik. Հայաստանում երեխաների նկատմամբ կատարված հանցագործությունների դեպքերն ավելանում են։ Տեղեկությունը հայտնում է դատախազությունը` հավելելով, որ եթե 2020-ին ստացվել է երեխաների նկատմամբ կատարված հանցագործությունների վերաբերյալ 259 հաղորդում, ապա 2021թ.-ին՝ 292 հաղորդում:
«Երեխաների նկատմամբ կատարված հանցագործություններից շարունակում են գերակշռել նրանց ծեծելու, ֆիզիկական կամ հոգեկան ուժեղ տառապանք պատճառելու, 16 տարին չլրացած անձի հետ սեռական հարաբերություն ունենալու, երեխաների նկատմամբ անառակաբարո գործողություններ կատարելու, ծնողի կամ այլ մերձավոր ազգականի և երեխայի միջև տեսակցության իրականացմանը խոչընդոտելու դեպքերը»,–ասված է հաղորդագրության մեջ։
2021թ.-ի ընթացքում մեղադրական եզրակացությամբ դատարան է ուղարկվել երեխաների նկատմամբ կատարված հանցագործությունների դեպքերով քննված 90 քրեական գործ՝ 101 անձի վերաբերյալ: Քրեական հետապնդման ենթարկված անձանց 52%-ը եղել է 18-35 տարեկան, իսկ 40%-ը՝ 35 տարեկանից բարձր տարիքի անձինք:
Ուսումնասիրության արդյունքներով արձանագրվել է, որ երեխաների նկատմամբ հանցագործությունների 40%-ը կատարվել է նրանց դաստիարակողների կողմից։