ԵՐԵՎԱՆ, 30 մայիսի – Sputnik. «Դիմադրություն» շարժման անդամներն ու նրանց կողմնակիցները մայիսի 31-ին շարունակելու են այցելել պետական հաստատություններ, տարբեր հիմնարկներ` իմանալու մարդկանց դիրքորոշումները։ Ֆրանսիայի հրապարակում կազմակերպված աշխատանքային քննարկմանը հայտարարեց «Դիմադրություն» շարժման անդամ, ՀՀ ԱԺ փոխխոսնակ Իշխան Սաղաթելյանը։
«Սա կարևոր է ու անհրաժեշտ։ Պետք է հասկանանք, թե ով է մեր փաստաթղթին դեմ ու ինչի համար։ Մեր հայրենակիցներին կոչ եմ անում մոտենալ իրենց համայնքների ղեկավարներին, ՀՀ բոլոր մարզերում հավաքվել մարզպետարանների դիմաց ու դիրքորոշում պահանջել։ Բոլորը պետք է ասեն` իրենց համար թանկ է պաշտո՞նը, թե՞ հայրենիքը։ Վաղն առավոտյան ժամը 11։00-ին հավաքվում ենք Ֆրանսիայի հրապարակում ու շարունակում ենք այցելել տարբեր հաստատություններ»,- նշեց Սաղաթելյանը։
Նա նաև հայտնեց, որ ժամը 19։00-ին հանրահավաք է լինելու։
ԱԺ փոխխոսնակի խոսքով` սեղանին դրված է հայրենիքի հարցը, հետևաբար, որևէ ոստիկանական ուժ չի կարող կասեցնել հայ ժողովրդի այս պայքարը։ Սաղաթելյանի պնդմամբ` ձերբակալելով, որևէ մեկի բիզնեսի կամ ընտանիքի հետևից գնալով` ներկայիս իշխանությունները արդյունքի չեն հասնելու։
«Այդ ճանապարհով այս իշխանությունը պահել չեն կարողանալու, որովհետև հայ մարդը ոտքի է կանգնել ու գնալու է մինչև վերջ։ Պետք է այս ամենի միջով անցնենք, հաղթանակի հասնելու ճանապարհը սա է»,- նշեց Սաղաթելյանը։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։
Մայիսի 25-ին հայտնի դարձավ, որ խորհրդարանական երկու ընդդիմադիր՝ «Պատիվ ունեմ» և «Հայաստան» խմբակցությունները, հանդես են եկել արտահերթ նիստ հրավիրելու նախաձեռնությամբ։ Նրանք առաջարկում են, որ ԱԺ-ն հայտարարությամբ հանդես գա, որում, ի թիվս այլ դրույթների, նշվի, որ Արցախը երբեք չի եղել ու չի լինելու Ադրբեջանի կազմում։
Այսօր կառավարության 3-րդ մասնաշենքի մոտ «Դիմադրություն» շարժման անհնազանդության ակցիայի ժամանակ ցուցարարների ու ոստիկանների միջև 2 անգամ բախում և հրմշտոց եղավ։ Ոստիկանները բռնի ուժով բերման ենթարկեցին ակցիայի մասնակիցներին։