ԵՐԵՎԱՆ, 30 մայիսի –Sputnik. Ղազախստանի առաջին նախագահ Նուրսուլթան Նազարբաևը հունիսի 5-ին կայանալիք հանրաքվեում կաջակցի երկրի Սահմանադրության փոփոխությունների ընդունմանը, որոնցից մի քանիսը բացառում են իր մասին հիշատակումը: Նազարբաևն այս մասին հայտնել է քաղաքագետ Դանիյար Աշիմբաևին տված հարցազրույցում։
«Այո՛, հունիսի 5-ին անպայման կօգտվեմ Սահմանադրությամբ ինձ տրված իրավունքից և կմասնակցեմ հանրաքվեին... Այս տարիներին ես ամեն կերպ աջակցել եմ նրան (նախագահ Կասիմ-Ժոմարտ Տոկաևին,-խմբ.)՝ մեր երկրի բարեփոխման և հետագա զարգացման գործողություններում։ Կարող եք չկասկածել, որ այս անգամ ևս կաջակցեմ»,- ասել է նա հարցազրույցում, որի տեքստը հրապարակվել է Աշիմբաևի Telegram ալիքում:
Նախկին նախագահի կարծիքով՝ պաշտոնից հեռանալուց հետո նրա որոշակի լիազորությունների պահպանումն անհրաժեշտ էր «քաղաքական սահուն անցում կատարելու ու հասարակության և իշխանական վերնախավի հնարավոր հակասությունները մեղմելու համար»:
Մեկնաբանելով Ղազախստանի հունվարյան իրադարձությունները՝ Նազարբաևը նշել է, որ Տոկաևի վճռական գործողությունները կանխել են դրանց զարգացման ամենավատ տարբերակը։
Նախկին նախագահի կարծիքով՝ անհրաժեշտ է պարզել, թե ով է կանգնած երկրում անկարգությունների կազմակերպման հետևում: Նա վստահություն է հայտնել, որ քննությունը կտա այդ հարցի պատասխանը։
Ավելի վաղ հաղորդվել է, որ Սահմանադրության՝ հանրաքվեի դրվող փոփոխությունները մշակվել են Տոկաևի առաջարկած քաղաքական բարեփոխումների ծրագիրն իրականացնելու համար:
Փոփոխությունները կոչված են ամրապնդելու անցումը իշխանության «սուպերնախագահական» ձևից նախագահական հանրապետության՝ ազդեցիկ խորհրդարանով ու հաշվետու կառավարությամբ:
Բացի այդ, նորացված Սահմանադրությամբ կբացառվեն երկրի առաջին նախագահի կարգավիճակի, լիազորությունների ու արտոնությունների մասին հիշատակումները։