ԵՐԵՎԱՆ, 30 մայիսի – Sputnik. Կառավարության երրորդ մասնաշենքի մուտքերը շրջափակած «Դիմադրություն» շարժման մասնակիցները բացեցին մուտքերը։
Նշենք, որ ընդդիմադիր պատգամավորներն ուզում էին հանդիպել նախարարների հետ, սակայն ոստիկանները թույլ չտվեցին։
«Տեղեկություններ կան, որ նախարարները շենքում չեն, և մեզ վերև չթողնելով պարզ դարձավ, որ նախարարներն էլ կիսում են վարչապետ Նիկոլ Փաշինյանի տեսակետներն Արցախի վերաբերյալ»,–ասաց շարժման անդամ Իշխան Սաղաթելյանը։
Նա հայտնեց, որ Հանրապետության փողոցով քայլերթը կշարունակեն և ճանապարհին կորոշեն` որտեղ են կանգառ ունենալու։
Հայտնել ենք, որ ՀՀ կառավարության երրորդ մասնաշենքի մոտ գտնվող «Դիմադրություն» շարժման մասնակիցների և ոստիկանների միջև ակցիայի ժամանակ հրմշտոց է սկսվել։ Կադրերում երևում է, որ որոշ մարդկանց ինքնազգացողությունը հրմշտոցից վատանում է։
Ինչպես հաղորդել ենք, «Դիմադրություն» շարժման անդամները Ֆրանսիայի հրապարակից քայլերթով հասան նախարարությունների այս մասնաշենքի մոտ։
Շարժման անդամ Իշխան Սաղաթելյանը տեղեկացրեց, որ այսօրվանից այցելելու են պետական գիտական, կրթական տարբեր հաստատություններ` ներկայացնելու հայ-թուրքական և հայ-ադրբեջանական հարաբերությունների մասին իրենց հայտարարության տեքստը։
Հավելենք, որ մայիսի 25-ին հայտնի դարձավ, որ խորհրդարանական երկու ընդդիմադիր՝ «Պատիվ ունեմ» և «Հայաստան» խմբակցությունները, հանդես են եկել արտահերթ նիստ հրավիրելու նախաձեռնությամբ։ Նրանք առաջարկում են, որ ԱԺ-ն հայտարարությամբ հանդես գա, որում, ի թիվս այլ դրույթների, նշվի, որ Արցախը երբեք չի եղել ու չի լինելու Ադրբեջանի կազմում։
ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանն իր ֆեյսբուքյան էջում գրել է, որ «Քաղաքացիական պայմանագիր» խմբակցությունը չի մասնակցելու Արցախի հարցով ընդդիմության հրավիրած ԱԺ արտահերթ նիստին։