ԵՐԵՎԱՆ, 30 մայիսի – Sputnik. «FlyOne Armenia» ավիաընկերությունը հունիսի 17-ից վերսկսում է Երևան -Լիոն-Երևան, Երևան-Փարիզ-Երևան երթուղով կանոնավոր ուղիղ չվերթերը: Տեղեկությունը հայտնում է ավիաընկերության մամուլի ծառայությունը։
«Երևան-Լիոն-Երևան երթուղով չվերթերը «Զվարթնոց» միջազգային օդանավակայանից դեպի Լիոնի «Սենտ Էքզյուպերի» օդանավակայան կիրականացվեն շաբաթական 2 անգամ` երկուշաբթի և ուրբաթ օրերին: Երևան-Փարիզ-Երևան չվերթերը «Զվարթնոց» օդանավակայանից դեպի Փարիզի «Շառլ դը Գոլ» միջազգային օդանավակայան կիրականցվեն երեքշաբթի և շաբաթ օրերին:
Ավելի վաղ հայտնի էր դարձել, որ Թուրքիայի ավիացիոն իշխանությունը «FlyՕne Armenia» ընկերությանը չէր տրամադրել Թուրքիայի օդային տարածքով դեպի եվրոպական երկրներ չվերթերի իրականացման հնարավորություն։
Ստեղծված իրավիճակի արդյունքում ընկերությունը ստիպված էր մինչև հունիսի 10-ը չեղարկել Երևան-Լիոն-Երևան և Երևան-Փարիզ-Երևան ուղղություններով չվերթերը։
Հիշեցնենք, որ «Flyone Armenia»-ն հիմնադրվել է 2021 թ.։ Հոկտեմբերի 27-ին ՀՀ Քաղաքացիական ավիացիայի կոմիտեն «Flyone Armenia»-ին տրամադրել է օդանավ շահագործողի վկայական։
Ավիաընկերության պարկը բաղկացած է Airbus A320 ընտանիքի ինքնաթիռներից։ Դրանք ունեն 180 նստատեղ և համապատասխանում են Օդային տրանսպորտի միջազգային ասոցիացիայի (IATA) և EASA Security-ի բոլոր չափանիշներին: Ինքնաթիռներն ունեն HEPA օդային զտիչներ, որոնք ոչնչացնում են վիրուսների և բակտերիաների 99,97%-ը: Flyone-ը գործարկվել է 2016 թ․, Մոլդովայի Հանրապետությունում: