ԵՐԵՎԱՆ, 27 մայիսի – Sputnik. Չեռնոգորիայի նախագահ Միլո Ջուկանովիչը, որը պաշտոնական այցով գտնվում է Հայաստանում, խոստացել է Ադրբեջանում պահվող հայ ռազմագերիների և քաղաքացիական պատանդների հարցերը քննարկել ոչ միայն իր երկրի, այլև միջազգային գործընկերների շրջանակում: Ինչպես տեղեկացնում է ԱԺ մամուլի ծառայությունը, Ջուկանովիչն իր մտադրության մասին հայտնել է ԱԺ նախագահ Ալեն Սիմոնյանի հետ հանդիպմանը։
«Ջուկանովիչը նկատել է, որ հակամարտությունների կարճատև լուծումներին հաջորդում են երկարատև տառապանքները, ինչի հետևանքները ծանր ազդեցություն են ունենում երկրների համար: Նրա խոսքով՝ յուրաքանչյուր երկրի համար այս բարդ ժամանակներում կարևորն ինքնությունն ու դիմագիծը պահելն է, հատկապես Հայաստանի և Չեռնոգորիայի նման ոչ մեծ երկրների դեպքում»,–ասված է հաղորդագրության մեջ։
Խոսելով հետպատերազմական իրավիճակից՝ Ալեն Սիմոնյանը կարևորել է միջազգային գործընկերների գործուն աջակցությունը դեռ չլուծված մարդասիրական խնդիրների հանգուցալուծման հարցում:
Հիշեցնենք, որ Չեռնոգորիայի նախագահին արդեն ընդունել են ՀՀ վարչապետ Նիկոլ Փաշինյանն ու նախագահ Վահագն Խաչատուրյանը։
Չեռնոգորիայի նախագահի ընդունելության արարողությունը կայացավ ՀՀ նախագահի նստավայրի հետնաբակում։ Իսկ կառավարության շենք նա մուտք գործեց ծառայողական հետնամուտքով, քանի որ ընդդիմության բողոքի ցույցի մասնակիցները շրջափակել էին գլխավոր մուտքերը։