ԵՐԵՎԱՆ, 27 մայիսի – Sputnik. Չեռնոգորիայում մեծապես հարգում են ՀՀ ղեկավարության ջանքերը` ուղղված տարածաշրջանում խաղաղություն ու կայունություն ապահովելուն։ ՀՀ նախագահ Վահագն Խաչատուրյանի հետ հանդիպումից հետո այս հայտարարությունն արեց Չեռնոգորիայի նախագահ Միլո Ջուկանովիչը, որը մայիսի 26-ին Հայաստան է ժամանել երկօրյա պաշտոնական այցով։
«Չեռնոգորիան ավանդական հարաբերություններ ունի Հայաստանի ու առհասարակ Հարավկովկասյան տարածաշրջանի հետ, ինչպես օրինակ` Վրաստանի և Ադրբեջանի։ Մենք ունեցել ենք հարուստ անցյալ ու հնարավորություն ենք ունեցել տեսնելու, թե ինչպես են թյուրիմացությունները տարածաշրջաններում դանդաղեցնում զարգացումը։ Հաշվի առնելով այս փորձը և մեր բարեկամական նկրտումները` մենք ուշիուշով հետևում ենք ձեր երկրի ու տարածաշրջանի զարգացումներին»,– ասաց Ջուկանովիչը։
Չեռնոգորիայի նախագահը հույս հայտնեց, որ Հարավկովկասյան տարածաշրջանում երկարատև խաղաղության ու կայունության հնարավոր կլինի հասնել բացառապես քաղաքական միջոցներով։
Նա շեշտեց, որ այցի ընթացքում մեծ տեղ է հատկացվել նաև տնտեսական համագործակցության հարցերին, ուստի իրենք անհամբերությամբ սպասում են Հայաստանի հետ հետագա համագործակցությանը։
Հիշեցնենք, որ Չեռնոգորիայի նախագահին արդեն ընդունել են ՀՀ վարչապետ Նիկոլ Փաշինյանն ու նախագահ Վահագն Խաչատուրյանը։
Չեռնոգորիայի նախագահի ընդունելության արարողությունը կայացավ ՀՀ նախագահի նստավայրի հետնաբակում։ Իսկ կառավարության շենք նա մուտք գործեց ծառայողական հետնամուտքով, քանի որ ընդդիմության բողոքի ցույցի մասնակիցները շրջափակել էին գլխավոր մուտքերը։