ԵՐԵՎԱՆ, 26 մայիսի – Sputnik. Ընդդիմադիրները վաղը առավոտից կշարունակեն անհնազանդության ակցիաները։ Այս մասին Ֆրանսիայի հրապարակում ասաց «Դիմադրություն» շարժման համակարգող, ԱԺ փոխխոսնակ Իշխան Սաղաթելյանը։
«Վաղը անհնազանդության ակցիաներ կլինեն նաև մարզերում։ Վաղը մենք հանրահավաք չենք ունենա, քանի որ մեզ համար աշխատանքային օր է լինելու»,- ասաց նա։
Ընդդիմությունը վաղը պատրաստվելու է հաջորդ օրվա մեծ հանրահավաքին։
Սաղաթելյանը նշեց, որ մայիսի 28-ին Երևանում և Ստեփանակերտում ժամը 18-ին երկու մեծ հանրահավաքներ են նախատեսված։ Մինչ այդ՝ ժամը 16-ից ընդդիմադիրները ավտոերթով շարժվելու են Սարդարապատից Ֆրանսիայի հրապարակ։ Հանրահավաքի ավարտից հետո կլինի երթ։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։