Շուռնուխում ու Որոտանում թաղամաս կառուցելու համար լրացուցիչ գումարի կարիք կա

ԵՐԵՎԱՆ, 26 մայիսի – Sputnik. Ադրբեջանական ներխուժման հետևանքով Սյունիքի մարզի Շուռնուխ և Որոտան գյուղերի անօթևան մնացած բնակիչների համար նոր տներ կառուցելու, գյուղերի բարեկարգման համար 2021թ–ին հատկացված 420 մլն 783 հազար դրամը չի բավականացրել։

Կառավարության որոշմամբ այսօր լրացուցիչ ևս 395 մլն 706 հազար դրամ հատկացվեց թաղամասի կառուցման շինարարական աշխատանքները ամբողջությամբ և ժամանակին ավարտին հասցնելու համար։

Որոշման հիմնավորման մեջ ներկայացվում է, որ 13 տների կառուցման նախահաշվային արժեքը կազմել է 725 837 200 դրամ, ինժեներական ենթակառուցվածքների, տարածքի հենապատերի, տների պարիսպների ու ցանկապատերի կառուցման արժեքը` 277 696 500 դրամ։ Այսպիսով` նոր թաղամասի կառուցման շինարարական աշխատանքների իրականացման ընդհանուր ծրագրի նախահաշվային արժեքը կազմում է 1 191 832 800 դրամ:

Նշենք, որ կառուցվող տները նախատեսում են շահագործման հանձնել 2022 թվականի սեպտեմբեր-նոյեմբերին։

Հիշեցնենք` անօթևան մնացած որոտանցիներին ու շուռնուխցիներին ՀՀ կառավարությունը տրամադրել է միանվագ 300 000 դրամ և ամսական 68 000–ական դրամ աջակցություն (մինչև 2022թ–ի նոյեմբեր)։

Ըստ Սյունիքի մարզպետարանի տրամադրած տվյալների՝ 2021 թվականի դեկտեմբերի 3-ի դրությամբ աջակցության շահառուների ցուցակում ընդգրկված է եղել 43 անձ։ 2021թ. դեկտեմբերի 25-ին շահառու ընտանիքներից մեկում ծնվել է 1 երեխա։

Բացի այդ, Որոտանում տունը կորցրած 6 անձից բաղկացած 1 ընտանիք 2021 թվականի դեկտեմբերին 25 մլն դրամ փոխհատուցում է ստացել: Այդ հիմքով ընտանիքը հանվել է շահառուների ցանկից: Արդյունքում շահառուների թիվն այս պահին 38 է: