Շահումով խաղերի օրենքի փոփոխությունն իրավաչափ է, հասարակությունը կնկատի դրա օգտակար գործողության գործակիցը։ Sputnik Արմենիայի եթերում նման տեսակետ հայտնեց փաստաբան Լևոն Բաղդասարյանը՝ մեկնաբանելով «Շահումով խաղերի, ինտերնետ շահումով խաղերի և խաղատների», ինչպես նաև «Վիճակախաղերի մասին» օրենքներում փոփոխություններ կատարելու մասին օրինագիծը։
«Սա եզակի դեպքերից է, որ կառավարության նման դիրքորոշումը համարում եմ իրավաչափ, որովհետև սա այն ռիսկային գործունեության տեսակն է, որը հնարավորինս պետք է լինի պետական լիազոր մարմնի ուշադրության կենտրոնում»,- ասաց Բաղդասարյանը։
Նրա կարծիքով՝ ժամանակն է, որ օրենքում նաև փոփոխություններ մտցվեն, որոնք որոշակի պատասխանատվություն նախատեսեն այն մարմինների նկատմամբ, ովքեր շահումով խաղեր են ապահովում, որպեսզի ռիսկային անձանց՝ խաղամոլներին, ընդհանրապես արգելեն օգտվել շահումով խաղերից։
«Այսօրվա ամուսնալուծությունների մեծ մասը այն պատճառով է, որ անհատներն իրենց ամբողջ սեփականությունը գրավ են դնում, որպեսզի խաղան և պարտվում են։ Պետության միջամտությունը պետք է, որ տվյալ գործունեություն իրականացնող մարմինն էլ գիտակցի՝ կարևորը միայն գումար գանձելը չէ»,- նշեց փաստաբանը։
Շահումով խաղեր ապահովող մարմինները նաև հարկերի տեսանկյունից պետությանն օգուտ են տալիս։ Հարցին՝ ո՞ր մասում է պետությունը գերադասել քաղաքացու շահը պետական շահից, Բաղդասարյանը պատասխանեց՝ այդ շահն առանց քաղաքացու շահի անհասկանալի է, քանի որ քաղաքացու շահը պետական շահի բաղկացուցիչ մասն է։
Փաստաբանը, սակայն, վիճահարույց է համարում հանգամանքը, որ լիազոր մարմինները տեսնելու են, թե ով է խաղում։
«Անձը կարող է խաղամոլ չլինել, բայց խաղալ, ցանկալի չէ, որ լիազոր մարմինը կարողանա վերահսկել նրան։ Այս առումով ինչ-որ ռիսկ եմ տեսնում»,- մեկնաբանեց Բաղդասարյանը։
Փաստաբանը նաև նշեց՝ ցանկացած օրինագիծ կարող է չնախատեսված «խութեր» ունենալ, որոնք քաղաքացիները, հնարավոր է` շրջանցեն, բայց եթե պետության կողմից լինի նորմալ վերահսկողություն, այդ կարգի բաները շատ քիչ կլինեն։
Հիշեցնենք, որ հունիսի առաջին տասնօրյակից Հայաստանի պետական կառույցները հնարավորություն կունենան վերահսկելու շահումով խաղերի, վիճակախաղերի ու խաղատների վրա ծախսվող գումարները, տեսնել` ով է խաղում, ինչքան է խաղում ու ինչ գումարներով։
ԱԺ-ն մայիսի 25-ին 67 ձայնով երկրորդ ընթերցմամբ ու ամբողջությամբ ընդունեց «Շահումով խաղերի, ինտերնետ շահումով խաղերի և խաղատների», ինչպես նաև «Վիճակախաղերի մասին» օրենքներում փոփոխություններ կատարելու օրինագծերի փաթեթը։