ԵՐԵՎԱՆ, 26 մայիսի – Sputnik. Ղազախստանի մայրաքաղաք Նուր Սուլթանում կոմպոզիտոր Առնո Բաբաջանյանի ծննդյան 100-ամյակին նվիրված համերգ է անցկացվել։ «Սիրո դար» խորագրով միջոցառումը կազմակերպվել է Ռուսական տան «Ավելի քան 30» նախագծի շրջանակում: Տեղեկությունը հայտնում է Նուր Սուլթանի Ռուսական տան մամուլի ծառայությունը։
«Միջոցառումը նվիրված էր Առնո Բաբաջանյանի 100-ամյակին, Ռուսաստանի և Ղազախստանի, Ռուսաստանի և Հայաստանի, Հայաստանի և Ղազախստանի միջև դիվանագիտական հարաբերությունների հաստատման 30-ամյակին։ Համերգին մասնակցել են ղազախստանցի ականավոր բժիշկ և երգիչ Սերիկ Տոկպանովը, Նուր Սուլթան քաղաքի «Աստանա» էստրադային-սիմֆոնիկ նվագախումբը, ինչպես նաև Առնո Բաբաջանյանի հիշատակի հիմնադրամի մենակատարներ Սուրեն Պլատոնովը, Էլգիզ Կարաժանովան, Տատյանա Կիմը և այլք»,- տեղեկացրել են Ռուսական տան մամուլի ծառայությունից:
Համերգի ընթացքում հնչել են տարբեր սերունդների կողմից սիրված «Ոսկե տանգո», «Քո հետքերը», «Շնորհակալ եմ քեզ», «Գեղեցկության թագուհի», «Սիրո տարի», «Հարսանիք», «Վերադարձրու ինձ երաժշտությունը» ստեղծագործությունները։