ԵՐԵՎԱՆ, 26 մայիսի – Sputnik. Ընդդիմադիր «Դիմադրություն» շարժումը երթով հասել է Հանրապետության հրապարակ։ Նրանք այժմ կանգնած են, քանի որ հրապարակում տեղ չկա առաջ շարժվելու։ Ոստիկանների հետ բանակցելուց հետո ընդդիմադիրները ասացին, որ ոստիկանները հրապարակից հեռացնում են ոստիկանական ավտոբուսները, որպեսզի ճամփա բացեն ընդդիմադիրների համար։
Երթի մասնակիցները սկսեցին շարժվել դեպի կառավարության շենքը։ Կառավարության շենքի մոտ ոստիկանական մեծ ուժեր են կուտակված։
Մինչ այդ ընդդիմությունը ավանդական երթով անցավ մայրաքաղաքի կենտրոնական փողոցներով։ Այսօր երթը կարճ ժամանակով կանգ առավ Grand Hotel Yerevan-ի դիմաց։
Ընդդիմադիրներից Արամ Վարդևանյանը նշեց, որ այս հյուրանոցում է կանգ առել Չեռնոգորիայի նախագահի պատվիրակությունը։ Ընդդիմությունը հյուրանոցի պատուհանների տակ գոչեց` «Առանց Նիկոլ Հայաստան»։ Ցուցարարները գոչեցին, որ Փաշինյանը հայ ժողովրդի անունից խոսելու լեգիտիմություն չունի և շարժվեցին առաջ։
Ավելի վաղ ծրագրվում էր Չեռնոգորիայի և ՀՀ նախագահների հանդիպումը նախագահի նստավայրում, սակայն, Սաղաթելյանի խոսքով, այն չեղարկվել էր, դրա համար էլ ընդդիմադիրները չիրականացրին երթ դեպի նախագահական։ Չեռնոգորիայի նախագահը Հայաստանում կլինի երկու օր։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։