ԵՐԵՎԱՆ, 24 մայիսի – Sputnik. Վերջին իրադարձությունները ցույց տվեցին, որ Ռուսաստանը պետք է վերլուծի իր արտաքին քաղաքականությունը, ավելի ակտիվ «գա» հետխորհրդային տարածք, տարածաշրջաններ, որտեղ նրան սպասում են։ «Ռոսիա սեգոդնյա» մեդիահարթակում կազմակերպված «Նոր իրողության նոր իմաստներ» համաժողովում այս հայտարարությունն է արել Դաշնային խորհրդի փոխխոսնակ Կոնստանտին Կոսաչևը։
Նրա կարծիքով` այսօրվա իրավիճակը կարող է արտացոլվել Ռուսաստանի արտաքին քաղաքականության հայեցակարգում։
«Ակնհայտ է, որ մենք ստիպված կլինենք հեռանալ այն միասնական Եվրոպայից, որը միասին ենք ստեղծել և որը դեռ երկար է բաժանվելու»,– ասել է քաղաքական գործիչը։
Կոսաչևի խոսքով` ՌԴ–ն տնտեսության առումով պետք է դասեր քաղի, քանի որ ակնհայտ է` ներմուծումների փոխարինման ծրագիրը մինչև վերջ չի կատարվել։
Նա հավելել է, որ պետք է սեփական լիարժեք տնտեսական զարգացում ապահովվի` ուղղված քաղաքացիների բարեկեցությանը։
«Մարդասիրական ոլորտում պետք է առաջին պլան մղենք մեր երկրի բացառիկությունը` էթնիկ, կրոնական, վարչական կացութաձևի տեսանկյունից», – ասել է Կոսաչևը։
Ավելի վաղ Դաշնային խորհրդի փոխխոսնակը վերջին երկու տասնամյակների պատմությունն անվանել էր Արևելյան Եվրոպայի և նախկին խորհրդային հանրապետությունների` Արևմուտքին հանձնվելուց հետո կատարվածի պատասխանատվությունը գիտակցելու ժամանակաշրջան։
Կոսաչևը հայտարարել էր նաև, որ Արևմուտքը երբեք չի հրաժարվել «սառը պատերազմի» հանգուցալուծումը միայն իր օգտին շրջելու գաղափարից։ Նրա խոսքով` երբ իրադարձություններն ըստ պլանի չզարգացան, ընտրություն արվեց հօգուտ հակամարտության վերսկսման։ Նա ընդգծել էր, որ ամեն դեպքում ամբողջ աշխարհը չի հանձնվել Արևմուտքին, այդ իսկ պատճառով էլ վերջնական հաղթանակի հասնելու համար նոր առճակատում պահանջվեց։