ԵՐԵՎԱՆ, 24 մայիսի – Sputnik. ՀՀ կառավարությունն առաջարկում է «Կրթության մասին» օրենքում լրացումներ կատարել` քրեակատարողական հիմնարկներում հանրակրթության բավարար ցենզ չունեցող, բայց 19 տարին լրացած դատապարտյալների կրթությունը պատշաճ ապահովելու համար։
Օրենքի նախագիծը Ազգային ժողովում ներկայացրեց ՀՀ արդարադատության փոխնախարար Արփինե Սարգսյանը։
«Ներկայում հանրակրթության իրավունք ունեն մինչև 19 տարեկան անձինք, եթե նրանք իրենց այդ իրավունքը չեն իրացրել ավելի վաղ։ Քրեակատարողական հիմնարկներում կա հանրակրթության բավարար ցենզ չունեցող շուրջ 300 դատապարտյալ, այսինքն, նրանք 9-րդ կամ 12-րդ դասարանի ատեստատ չունեն։ Այս առումով ունենք մի շարք խնդիրներ։ Դրանցից մեկն այն է, որ անձը` չունենալով համապատասխան կրթական ցենզ, չի կարողանում հավակնել աշխատաշուկայում պահանջարկ վայելող համապատասխան աշխատանք ունենալուն»,- նշեց Սարգսյանը։
Նա նաև շեշտեց` դատապարտյալների բավարար կրթական ցենզ չունենալը ՔԿՀ-ների աշխատակիցների համար էլ է խնդիր առաջացնում, հատկապես, դժվարանում է այդ անձանց հետ անհրաժեշտ սոցիալ-հոգեբանական, իրավական և այլ աշխատանքներ իրականացնելը։
ՀՀ կառավարությունն առաջարկում է դատապարտյալների վրա չտարածել «Կրթության մասին» օրենքում մինչև 19 տարվա ցենզը և հնարավորություն տալ 25, 30 կամ նաև 40 տարեկան դատապարտյալին ստանալ հանրակրթություն և ստանալ 9-րդ կամ 12-րդ դասարանի ատեստատներ։
Ծրագրի շահառու կհավակնեն դառնալ այն դատապարտյալները, որոնք 1 տարի կամ ավելի պատիժ պետք է կրեն։
19 տարեկանից բարձր անձանց համար ավելի խտացված է լինելու ուսումնական ծրագիրը։ Կրթությունն իրականացվելու է ինչպես առկա, այնպես էլ հեռավար եղանակներով։
Նախագծով՝ օրենքն ուժի մեջ կմտնի 2022 թվականի օգոստոսի 1-ից, որպեսզի դատապարտյալները սեպտեմբերից հնարավորություն ունենան դիմելու և ընդգրկվելու կրթական պրոցեսում։