ԵՐԵՎԱՆ, 24 մայիսի – Sputnik. ՀՀ ԱԺ պատգամավորները առաջարկում են արգելել խաղադրույքները կանխիկ եղանակով կատարելը։
«Շահումով խաղերի, ինտերնետ շահումով խաղերի և խաղատների մասին» օրենքում փոփոխություններ կատարելու մասին և «Վիճակախաղերի մասին» օրենքում փոփոխություններ կատարելու մասին նախագիծն ԱԺ նիստում ներկայացրեց օրենքի համահեղինակ Գևորգ Պապոյանը:
Նա շեշտեց՝ իշխանության համար շատ կարևոր խնդիր է խաղամոլության դեմ պայքարը, և իրենք տարբեր գործիքներ են կիրառելու, որպեսզի պայքարեն դրա դեմ:
«Օրենքն ուժի մեջ մտնելուց 10 օր հետո Հայաստանում հնարավոր չի լինելու իրականացնել կանխիկով խաղադրույք: Բացի այդ, 6 ամիս հետո հնարավոր չի լինելու խաղադրույք կատարել այն վճարային սարքերի միջոցով, որոնք կան փողոցներում»,- ասաց Պապոյանը:
Ըստ նրա` վիճակագրությունը ցույց է տալիս, որ խաղադրույքների մեծ մասը հենց այդ սարքերի միջոցով է տեղի ունենում: Հնարավորություն է լինելու խաղադրույք իրականացնել միայն բանկային հաշիվներից բանկային քարտերի միջոցով, այսինքն, անցում է կատարվում 100 տոկոսանոց անկանխիկ խաղադրույքի քաղաքականությանը։
Պատգամավորը շեշտեց, որ այս եղանակով ոչ միայն սահմանափակում են մարդկանց խաղալու հնարավորությունները, այլ նաև հնարավորություն կլինի որոշակի պատկեր տեսնել, թե իրականում ինչպիսի շրջանառություն կա ոլորտում։
Պատգամավորը նկատեց, որ սա լավ հնարավորություն կլինի՝ ապագայում ավելի ճիշտ հարկման համակարգի գնալու: Այս ոլորտում հարկերը բազմապատիկ քիչ են:
Նախագծի հեղինակները վստահ են, որ փոփոխությունները թույլ կտան ապահովել առավելագույն թափանցիկություն, պաշտպանել հատկապես սոցիալապես անապահով խավերի շահերը՝ լրացուցիչ խոչընդոտներ սահմանելով խաղադրույք կատարելու համար: