ԵՐԵՎԱՆ, 24 մայիսի – Sputnik. ԱԳՆ-ն այլևս չի սպասարկում Հայաստանի և հայ ժողովրդի շահերը։ Նման հայտարարությամբ հանդես եկավ «Դիմադրություն» շարժման ղեկավարներից Իշխան Սաղաթելյանը։
Հայտնել ենք, որ քաղաքացիներն արգելափակել են ԱԳ նախարարության շենքը։
«Եթե նրանք, ովքեր կասկածում էին իմ ասածի վրա, երեկվա բրյուսելյան հանդիպումից հետո կասկածի տեղ այլևս չունեն։ ԱԳՆ-ն վարչապետ Նիկոլ Փաշինյանի գլխավորությամբ արցախյան հակամարտության նշաձողն իջեցրել է այն մակարդակի, որ արդեն խոսվում է Ղարաբաղի էթնիկ հայության մասին»,- ասաց Սաղաթելյանն ու հավելեց` Նիկոլ Փաշինյանի և Ադրբեջանի նախագահ Իլհամ Ալիևի ցանկացած պամանավորվածություն ընդդիմության համար առոչինչ է։
Նա նշեց, թե արդեն իսկ խոսում են այն մասին, որ արցախցիներն Ադրբեջանի կազմում պետք է լայն իրավունքներ ունենան։ Սաղաթելյանը նշեց` Հայաստանը տանում է Արցախի հայաթափման և վերջնականապես կորստի, սակայն դա չի լինելու։
Սաղաթելյանն ասաց նաև, որ ԱԳՆ-ն որքան քիչ աշխատի, այնքան հայկական շահերը քիչ կվնասվեն։
«Հայաստան» խմբակցության պատգամավոր Արամ Վարդևանյանը նշեց, որ եթե ԱԳՆ-ն իր տեղում լիներ, ապա բրյուսելյան հայտարարությունը չէր լինի։
Նշենք, որ մայիսի 22-ին Բրյուսելում տեղի է ունեցել Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։ Համատեղ քննարկման արդյունքում պայմանավորվածություններ են ձեռք բերվել տարածաշրջանային կոմունիկացիաների բացմանն ուղղված աշխատանքների հետագա ընթացքի, սահմանների սահմանագծման ու անվտանգության հարցերով հանձնաժողովի աշխատանքների մեկնարկի վերաբերյալ:
Քննարկման առարկա են դարձել նաև երկու երկրների միջև հարաբերությունների կարգավորման բանակցային գործընթացի նախապատրաստություններին, հումանիտար խնդիրներին, ինչպես նաև Լեռնային Ղարաբաղի հիմնախնդրի կարգավորմանը վերաբերող հարցեր:
Պայմանավորվածություն է ձեռք բերվել շարունակել եռակողմ հանդիպումները` նախատեսելով նմանատիպ հանդիպում անցկացնել հուլիսին կամ օգոստոսին: