ԵՐԵՎԱՆ, 22 մայիսի - Sputnik. ՌԴ ռազմավարական նշանակության հրթիռային զորքերի հրամանատար Սերգեյ Կարակաևը «Սարմատ» միջմայրցամաքային բալիստիկ հրթիռները ռուսական «վրեժխնդրության սուր» է անվանել։
Խոսելով հրթիռի անվան ընտրության մասին՝ Կարակաևը նշել է, որ հինավուրց սարմատներ ժողովուրդն անվախ էր։ Նրանք ունեցել են ուղիղ թուր, որը հարված էր հասցնում թշնամուն։
«Հարձակումից առաջ նրանք մտածում էին, որ այդ սրի համար էլ իրենց վրեժխնդիր են լինելու։ Հավանաբար, մեր ժամանակակից հրթիռային համալիրի որակն այսօր թույլ է տալիս հենց այդ մասին խոսել, այն կարող է վրեժխնդրության սուր լինել և նախազգուշացնել, որ Ռուսաստանը հուսալիորեն պաշտպանված է»,- պարզաբանել է Կարակաևը «Զվեզդա» հեռուստաալիքի եթերում։
Նրա խոսքով՝ ռուսական նոր «Սարմատը» կարող է թռչել Հարավային և Հյուսիսային բևեռներով, ինչպես նաև այլ հետագծերով, և դեռ մոտ տասը տարի «Սարմատի» դեմ հակահրթիռային պաշտպանություն չի լինի։
Սպառազինության գծով Կարակաևի տեղակալ Սերգեյ Պորոսկուն իր հերթին նշել է, որ ռուսական նոր միջմայրցամաքային բալիստիկ «Սարմատ» հրթիռը սպառազինության մեջ տասնյակ տարիներ կմնա:
«Դա հեռանկարային հրթիռային համալիր է, որն առաջիկա 50 տարում մարտական հերթապահություն կիրականացնի»,- ասել է նա:
Ռուս գեներալը բացատրել է, որ նման երկար ժամանակահատվածը պայմանավորված է հրթիռի բնութագրերով և մեծ հուսալիությամբ: