ԵՐԵՎԱՆ, 22 մայիսի – Sputnik. Երևանի Կարեն Դեմիրճյանի անվան մարզահամերգային համալիրում կայացավ Եվրոպայի բռնցքամարտի առաջնության բացման հանդիսավոր արարողությունը։
Այդ մեծ իրադարձության նախնական մենամարտերը կսկսվեն մայիսի 23-ին: Ժամը 14:00-ից կլինեն ցերեկային մենամարտերը, իսկ 18:00-ից սկսած` երեկոյան: Կիսաեզրափակիչ մենամարտերը կկայանան մայիսի 27-ին, եզրափակիչները` մայիսի 30-ին:
Այս առաջնությանը կմասնակցի 39 երկրի 200-ից ավելի մարզիկ: Եվրոպայի առաջնության ընդհանուր մրցանակային ֆոնդը կազմում է 260 հազար դոլար: Մենամարտերի վիճակահանությունն այսօր է:
Բռնցքամարտի Հայաստանի հավաքականի գլխավոր մարզիչ Կարեն Աղամալյանն ավելի վաղ հրապարակել է հավաքականի կազմը, որը կմասնակցի Երևանում կայանալիք Եվրոպայի առաջնությանը։
Մեր մարզիկներն են՝ 48 կգ Բարեղամ Հարությունյանը, 51 կգ Արթուր Հովհաննիսյանը, 54 կգ Ջանիկ Սահակյանը, 57 կգ Արթուր Բազեյանը, 60 կգ Կարեն Տոնականյանը, 63,5 կգ Հովհաննես Բաչկովը, 67 կգ Գուրգեն Մադոյանը, 71 կգ Նարեկ Զախարյանը, 75 կգ Վախթանգ Հարությունյանը, 80 կգ Համբարձում Հակոբյանը, 86 կգ Ռաֆայել Հովհաննիսյանը, 92 կգ Նարեկ Մանասյանը, գերծանր քաշային կարգում` Դավիթ Չալոյանը։
Տեղեկացվում է, որ առաջնության տոմսերի արժեքը 2000-10.000 դրամ է: Դրանք վաճառվում են Մարզահամերգային համալիրի տոմսարկղերում: Մայիսի 30-ին Հայաստանում կկայանա EUBC գործկոմի նիստը։