ԵՐԵՎԱՆ, 21 մայիսի – Sputnik. Հայաստանի, Ռուսաստանի և Ադրբեջանի տրանսպորտային հաղորդակցության ապաշրջափակման աշխատանքային խումբն արդյունավետ է: Այս մասին ՌԻԱ Նովոստիին տված հարցազրույցում հայտարարել է Հայաստանի փոխվարչապետ Մհեր Գրիգորյանը:
Նրա խոսքով՝ կողմերին հաջողվել է համաձայնության հասնել մի շարք հարցերի շուրջ, սակայն կան նաև տարաձայնություններ։
«Հայաստանի, Ռուսաստանի և Ադրբեջանի փոխվարչապետների համանախագահությամբ եռակողմ աշխատանքային խմբի գործունեությունը միանշանակ արդյունավետ է։ Ենթախմբերի փորձագետները հսկայական աշխատանք են կատարել, կան կոնսենսուսներ, բայց կան նաև տարաձայնություններ, որոնց շուրջ մենք փորձում են լուծումներ գտնել մեր հանդիպումների ընթացքում»,- ասել է Գրիգորյանը։
Նա վստահություն է հայտնել, որ առաջիկայում կհստակեցվի հերթական հանդիպման ժամանակը։
2021 թվականի հունվարին Հայաստանի, Ադրբեջանի և Ռուսաստանի ղեկավարների բանակցություններից հետո նախագահ Պուտինը հայտարարել է աշխատանքային խմբի ստեղծման մասին, որը գլխավորելու են երեք երկրի փոխվարչապետները (ՌԴ-ից Ալեքսեյ Օվերչուկն է լինելու):
Աշխատանքային խումբը պատասխանատու է Հայաստանի և Ադրբեջանի միջև երկու երկրների տարածքով միջազգային փոխադրումների կազմակերպման համար անհրաժեշտ տրանսպորտային ենթակառուցվածքի նոր օբյեկտների վերականգնման և կառուցման համար: