ԵՐԵՎԱՆ, 19 մայիսի ֊ Sputnik. Ընդդիմադիրները վաղը շենքեր չեն շրջափակի, բայց անելիքներ կլինեն։ Այս մասին Ֆրանսիայի հրապարակում օրվա ամփոփիչ հանրահավաքում հայտարարեց «Դիմադրություն» շարժման անդամ, ԱԺ փոխխոսնակ Իշխան Սաղաթելյանը։
«Վաղը 09։30 հավաքվում ենք Ֆրանսիայի հրապարակում, կլինեն ակցիաներ, բայց չենք շրջափակելու շենքեր։ Եկե՛ք, միացե՛ք, 10։30 եկեք, եթե ավելի շուտ հարմար չէ։ Լիքը աշխատանքներ կան անելու»,-ասաց նա։
Սաղաթելյանը նշեց, որ պետք է աշխատել միջազգային մարմինների հետ։ Իսկ ժամը 19։00-ին կլինի հերթական հանրահավաքը։ Նա շեշտեց, որ վաղը կարևոր, վճռական օր է լինելու։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։