ԵՐԵՎԱՆ, 18 մայիսի – Sputnik․ Ոստիկանական ավտոբուսի վարորդը ստիպված եղավ բացել ավտոբուսի դուռն ու դուրս թողնել բերման ենթարկվածներին, քանի որ «Դիմադրություն» շարժման մասնակիցները փակել էին ավտոբուսի ճանապարհը։ Ֆեյսբուքյան ուղիղ եթերի ժամանակ իրավիճակը ներկայացրեց «Հայրենիք» կուսակցության մամուլի քարտուղար Սոս Հակոբյանը, որը ևս բերման ենթարկվածների թվում էր։ Դրանից մոտ կես ժամ անց նրան և մի շարք այլ քաղաքացիների ևս մեկ անգամ բերման ենթարկեցին։
«Նույն ավտոբուսով ուղղակի քառասուն րոպե անց շարունակում ենք բերման ենթարկվել։ Այս անգամ այլ վայրից բերման ենթարկվեցինք, մեզ նույն վարորդն է ուղեկցում, հուսով ենք՝ այս անգամ էլ կխնդրենք, կբացի, դուրս կգանք»,- նշեց Հակոբյանը։
Թերևս այս անգամ վարորդը չբացեց ավտոբուսի դուռը, քանի որ քիչ անց Սոս Հակոբյանը ֆեյսբուքյան մեկ այլ գրառմամբ տեղեկացրեց, որ իրենց տանում են ոստիկանության Արտաշատի բաժին։
«Երևան քաղաքում նենց պայքար ա ընթանում, որ մեզ ճարահատյալ տանում են Արտաշատի ոստիկանության բաժին: Նոր իմացանք, որ մեր մյուս տղերքին տանում են Աբովյան և Հրազդան»,- գրել է Հակոբյանը։
Հայտնել ենք, որ «Դիմադրություն» շարժումն այսօր վաղ առավոտից սկսել է անհնազանդության ակցիանները` Երևանի տարբեր փողոցներում երթևեկությունը կաթվածահար անելով։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։ Մասնակիցները պահանջում են ՀՀ վարչապետ Նիկոլ Փաշինյանի հրաժարականը։