ԵՐԵՎԱՆ, 18 մայիսի – Sputnik․ ԱԱԾ նախկին տնօրեն, «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանն ու պատգամավորներ Տիգրան Աբրահամյանը և Արմենուհի Կյուրեղյանն այցելել են զոհված զինվորների ծնողներին, որոնք ակցիա են անում ՔԿ զինվորական քննչական գլխավոր վարչության մոտ։
Արթուր Վանեցյանն ասաց, թե եկել են հասկանալու՝ ինչո՞ւ են ձերբակալել 44-օրյա պատերազմում զոհված զինվոր Մխիթար Գալեյանի հորը՝ Գարիկ Գալեյանին։
«Եկել ենք տեսնենք, թե մեր հերոսի հորը` Գարիկ Գալեյանին, ի՞նչ հիմքով են ձերբակալել և առհասարակ ո՞նց կարելի է նման բանի ականատես լինել, անհասկանալի իրավիճակ է»,- լրագրողներին ասաց Վանեցյանը։
ԱԺ «Պատիվ ունեմ» խմբակցության պատգամավորները մտան ՔԿ զինվորական վարչություն՝ հանդիպելու քննիչի հետ։
Հայտնել ենք, որ 44-օրյա պատերազմում զոհվածների հարազատները կրկին հավաքվել են ՀՀ քննչական կոմիտեի զինվորական քննչական գլխավոր վարչության մոտ։ Նրանք բողոքի ակցիա են անում և բացատրություն պահանջում զինվորական քրեական գործերով քննիչի անգործության վերաբերյալ։
Հիշեցնենք, որ ձերբակալվել է Արցախյան 44-օրյա պատերազմի հերոս Մխիթար Գալեյանի հայրը՝ Գարիկ Գալեյանը։
ՀՀ քննչական կոմիտեն հաղորդել է, թե մայիսի 17-ին, ժամը 14:05-ի սահմաններում մի խումբ անձինք սահմանված կարգի խախտմամբ, մուտք են գործել ՀՀ ՊՆ N զորամասի տարածք։ ՔԿ հաղորդմամբ՝ նրանք չեն ենթարկվել զորամասի տարածքը լքելու՝ զորամասի հրամանատարի սպառազինության գծով տեղակալ, գնդապետի օրինական պահանջին, հայհոյել են, քաշքշել և բռնություն գործադրել նրա նկատմամբ՝ պլաստմասե շշով հարվածելով դեմքին:
Ըստ ՔԿ-ի, նրանք Մխիթար Գալեյանի հայրն ու հորեղբայրն են՝ Գարիկ և Արթուր Գալեյանները, ինչպես նաև քաղաքացի Ազգուշ Մարտիրոսյանը: Գարիկ Գալեյանը ձերբակալվել է։