ԵՐԵՎԱՆ, 18 մայիսի – Sputnik․ Երևանի Թումանյան փողոցում ոստիկանները բազմաթիվ քաղաքացիների բերման ենթարկեցին։ Հատկանշական է, որ բերման ենթարկելու պահին փողոցը փակված չէր, քաղաքացիները քայլերթ էին իրականացնում։
ԱԺ «Հայաստան» խմբակցության պատգամավոր Աննա Գրիգորյանը բարձրախոսով հայտարարեց, որ քաղաքացիներին բերման ենթարկել սկսեցին այն բանից հետո, երբ կարմիր բերետավորներից մեկը հանձնարարեց․ «Բոլոր տղաներին տանե՛լ»։
«Տներից էլ հանե՛ք, տղաներին տարե՛ք․․․ Ի՞նչ հիմքով եք բերման ենթարկում, եթե մայթով քայլում էինք»,- ոստիկանների գործողություններից զայրացած՝ բղավում էր Աննա Գրիգորյանը։
Բերման ենթարկվեց նաև մի քաղաքացի, որը, ըստ պատգամավորի, հենց նոր էր միացել իրենց։
«Կարծում եք՝ աղջիկներով կվախենա՞նք քայլել»,- հայտարարեցին ընդդիմադիր կանայք ու շարունակեցին քայլել։
Նշենք, որ երեկ ուշ երեկոյան «Դիմադրություն» շարժման անդամ Իշխան Սաղաթելյանը Երևանի Ֆրանսիայի հրապարակում հայտարարեց, որ այսօր առավոտյան ժամը 8-ից ընդդիմության անհնազանդության խաղաղ ակցիանները վերսկսվելու են։
«Մենք պետք է հասնենք նրան, որ ո՛չ բաժիններում տեղ լինի, ո՛չ ոստիկանական ուժերը հերիքեն, ո՛չ էլ որևէ կերպ հնարավոր լինի կասեցնել»,- ասաց նա։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։