ԵՐԵՎԱՆ, 18 մայիսի – Sputnik. «Դիմադրություն» շարժումը վաղն առավոտից կրկին շարունակելու է անհնազանդության ակցիաները։ Ֆրանսիայի հրապարակում այս հայտարարությունն արեց «Դիմադրություն» շարժման անդամ, ՀՀ ԱԺ փոխխոսնակ Իշխան Սաղաթելյանը։
«Այլ ճանապարհ ու տարբերակ չկա։ Քայլերով և գործողություններով պետք է ավելացնենք մեր թիվը, ծավալը մեծացնենք, հասնենք մեր առջև դրված նպատակին։ Կոչ եմ անում առավոտյան ամբողջ կազմով միանալ բողոքի և անհնազանդության ակցիաներին»,– նշեց Սաղաթելյանը։
Նա հայտնեց, թե ժամը 08։00-ին որտեղից են սկսվելու ակցիաները։ Ըստ այդմ` Շենգավիթ վարչական շրջանում քաղաքացիներն իրենց բողոքի ցույցերը սկսելու են Գարեգին Նժդեհի հրապարակից, Արաբկիրում` Կոմիտասի եկեղեցու մոտից, Ավանում` Աճառյան փողոցում գտնվող «Հարսնաքար» ռեստորանային համալիրի մոտից, Էրեբունի վարչական շրջանում` Սասունցի Դավթի արձանի դիմացից, Նոր Նորքի 2-րդ զանգված՝ «Մեգամոլ» առևտրի կենտրոնի մոտից։ Աջափնյակ վարչական շրջանում հասցեները երկուսը կլինեն` 15-րդ թաղամաս` Հանրապետական հիվանդանոցի դիմացի այգու մոտից և Լենինգրադյան-Սեբաստիա խաչմերուկից։ Ակցիաներ կմեկնարկեն նաև Ֆրանսիայի հրապարակից, որտեղ կվերադառնան 19։00-ին և հանրահավաք կանցկացնեն։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։