ԵՐԵՎԱՆ, 18 մայիսի – Sputnik. ԱՊՀ երկրների սահմանապահ զորքերի հրամանատարները այսօր Թուրքեստանում (Ղազախստանի հարավ) հանդիպման ժամանակ Համագործակցության արտաքին սահմանների պաշտպանության հարցում համագործակցելու հարցեր են քննարկել։ Այս մասին հայտնում է ՌԻԱ Նովոստին` հղում անելով Ղազախստանի ազգային անվտանգության կոմիտեի մամուլի ծառայությանը։
Ամփոփվել է նաև սահմանային անվտանգության ապահովման համակարգի ձևավորման և համատեղ հատուկ սահմանային գործողությունների անցկացման վերաբերյալ սահմանապահ զորքերի հրամանատարների խորհրդի գործունեությունը։
«Ուսումնասիրվել են սահմանապահ զորքերի հրամանատարների խորհրդի առաջիկա տարվա խնդիրներն ու տեղեկատվության փոխանակման կատարելագործման, գիտահետազոտական և կրթական ոլորտներում համագործակցության զարգացման մեխանիզմները»,- ասվում է հաղորդագրության մեջ։
Միջոցառմանը մասնակցել են Հայաստանի, Ադրբեջանի, Բելառուսի, Ղազախստանի, Ղրղզստանի, Ռուսաստանի, Տաջիկստանի, Թուրքմենստանի և Ուզբեկստանի սահմանապահ գերատեսչությունների պատվիրակությունները։
Սահմանապահ զորքերի հրամանատարների խորհրդի հաջորդ նիստը տեղի կունենա Տաջիկստանում 2022 թվականի երկրորդ կիսամյակում։