ԵՐԵՎԱՆ, 17 մայիսի - Sputnik. Սահմանազատման ու սահմանագծման հանձնաժողովը մինչև հիմա չի ստեղծվել։ Այս մասին այսօր Ֆրանսիայի հրապարակում ընթացող հանրահավաքում հայտարարեց ԱԺ «Հայաստան» խմբակցության» պատգամավոր Աննա Գրիգորյանը։
«Հանձնաժողով պետք է ստեղծվեր, որը մինչև հիմա չի ստեղծվել։ Թե ինչ հիմունքներով, ինչ սկզբունքներով պետք է ստեղծվի, որևէ մեկը դրա մասին չգիտի։ Բայց ի՞նչ են ասում սրանք ( իշխանությունները - խմբ.)։ Ասում են՝ այդ գործընթացի համատեքստում կարելի է հայելային հետքաշում իրականացնել։ Պետք է բացառել հայելային հետքաշումը, քանի որ դա նշանակում է փաստացի վերահսկողության կորուստ սեփական տարածքի նկատմամբ։ Դա կարող է ասել մարդ, ով ընդհանրապես չի ճանաչում սեփական երկրի տարածքը, ով չի տիրապետում սեփական երկրի քարտեզին»,- ասաց ընդդիմադիր պատգամավորը` հայտարարելով, որ ՀՀ ոչ մի տարածքում ու հատկապես` Սոթք-Խոզնավար հատվածում հայելային հետքաշում չի լինելու։
Նա նաև նշեց, որ սահմանազատումն ու սահմանագծումն անթույլատրելի են, քանի դեռ ադրբեջանական զորքերը կանգնած են ՀՀ տարածքում։
«Սև լճում, Գեղարքունիքում դեռ ադրբեջանական զորքեր են։ Ուժի սպառնալիքի ներքո սահմանազատում, սահմանագծում չի լինելու»,- հայտարարեց Գրիգորյանը։
Հավելենք, որ այսօր ՌԴ ԱԳ նախարար Սերգեյ Լավրովի հետ հանդիպմանը Հայաստանի արտգործնախարար Արարատ Միրզոյանը հայտարարել է՝ Հայաստանի և Ադրբեջանի սահմանազատման և սահմանային անվտանգության հանձնաժողովների հանդիպումը նախատեսված է հաջորդ շաբաթ Մոսկվայում։