Մենք ձեր մայրերից չենք տարբերվում, խի՛ղճ ունեցեք. Տոնոյանը` դատավորներին և դատախազներին

ԵՐԵՎԱՆ, 17 մայիսի - Sputnik. Արցախյան 44-օրյա պատերազմում զոհված Մենուա Հովհաննիսյանի մայրը` «5165» շարժման առաջնորդ Կարին Տոնոյանն այսօր Ֆրանսիայի հրապարակի բեմահարթակից դիմեց նրանց, ովքեր, իր խոսքով, իրենց «դատարանից դատարան են քարշ տալիս»։

Զոհվածի մայրը խոսքն ուղղեց ՀՀ դատավորներին ու դատախազներին, այդ թվում` ՀՀ գլխավոր դատախազին։

«Եթե այս չափազանց կարևոր ու զգայուն գործով Հայաաստանում չեղավ արդարադատություն, ապա ես չեմ հավատում, որ որևէ այլ գործով Հայաստանում կլինի արդարություն ու արդարադատություն։ Եթե 5000 սպանված տղաների գործը ձեզ չի հուզում, և դուք ընդունակ եք այսպես անբարո վերաբերվելու այս գործին, ուրեմն դուք իրավունք չունեք որևէ այլ դատ իրականացնելու և ընդհանրապես մոտենալու արդարադատությանը»,- ասաց Տոնոյանը։

Զոհված զինվորի մայրը նշեց, որ դեռ շատ անգամներ են ստիպված լինելու կանգնել դատարաններում ու հույսով նայելու դատավորների ու դատախազների դեմքերին։ Ուստի նրանց էլ հորդորեց այդ դատավարություններին գալուց առաջ առավոտյան ուշադիր նայել իրենց մայրերի աչքերին։

Հիշեցնենք` 44-օրյա պատերազմում զոհվածների ծնողները մի քանի օր շարունակ բողոքի ակցիաներ էին անում ՀՀ գլխավոր դատախազության շենքի դիմաց։ Նրանք դատախազին են փոխանցել իրենց ստորագրություններով դիմում-պահանջը՝ 44-օրյա պատերազմի վերաբերյալ քրգործում վարչապետ Նիկոլ Փաշինյանին որպես մեղադրյալ ներգրավելու և իրենց տուժող ճանաչելու մասին։

Ապրիլի 28-ին դատախազությունից ծնողներին հայտնել են, որ միջնորդությունն ուղարկվել է քրգործի վարույթն իրականացնող մարմնին։

Նշենք, որ ծնողների դիմումը վերաբերում է ՀՀ ՀՔԾ-ում 2020թ. նոյեմբերի 21-ին պաշտոնեական լիազորությունները չարաշահելու հատկանիշներով հարուցված քրգործին. քննության առարկա են պատերազմից առաջ և դրա ընթացքում ՀՀ բարձրաստիճան պաշտոնատար անձանց կողմից ենթադրաբար կատարված այնպիսի արարքներ, որոնք բացասական նշանակություն են ունեցել զինված ուժերի մարտունակության հարցում և ազդել են պատերազմի արդյունքի վրա։

Քրգործի նախաքննությունը հանձնված է ՀՀ հակակոռուպցիոն կոմիտեին։