ԵՐԵՎԱՆ, 16 մայիսի – Sputnik. ՀՀ վարչապետ Նիկոլ Փաշինյանը Կրեմլում հանդիպել է ՌԴ նախագահ Վլադիմիր Պուտինի հետ, տեղեկանում ենք ՌԻԱ Նովոստիից։
Պուտինը Փաշինյանին առաջարկել է քննարկել տարածաշրջանային հարցերը, այդ թվում ԼՂ հարցը, ինչպես նաև անդրադարձ կատարել տնտեսական ոլորտին։
«Մենք Ձեզ հետ պարբերաբար կապի մեջ ենք երկկողմ օրակարգի, ինչպես նաև տարածաշրջանային խնդիրների առնչությամբ։ Այնուամենայնիվ, հարցերը միշտ շատ են»,–ասել է Պուտինը հանդիպման սկզբում։
Նա նշել է, որ երկրների միջև ապրանքաշրջանառության աճ կա` ներդրումային ծրագրերը շարունակվում են։
«Մենք շարունակում ենք ակտիվորեն աշխատել ղարաբաղյան հիմնախնդրի կարգավորման հարցի շուրջ արդեն իսկ եռակողմ ձևաչափով՝ Ադրբեջանի մեր գործընկերների հետ»,–ասել է Պուտինը։
Փաշինյանն էլ իր հերթին նշել է, որ հայ-ռուսական հարաբերությունների երկկողմ օրակարգը չափազանց հագեցած է, և երկրների ղեկավարները քննարկելու շատ բան ունեն:
Նրա խոսքով` մարտին գրանցված որոշակի անկումից հետո այժմ նախատեսվում է ակտիվացնել երկկողմ տնտեսական կապերը։ Ռուսական բիզնեսը շահագրգռված է ներդրումներ կատարել Հայաստանում։
«Ուզում եմ իմ երախտագիտությունը հատնել, որ Դուք ուղղորդել եք ռուս գործարարներին ներդրումներ անել ՀՀ–ում»,–ասել է Փաշինյանը։
Վարչապետը հայտնել է, որ կցանկանար քննարկել նաև տարածաշրջանում տիրող իրավիճակը և Լեռնային Ղարաբաղի հակամարտության կարգավորման հարցը, ինչպես նաև համատեղ հայտարարության մեջ նշված ԵԱՀԿ Մինսկի խմբի համանախագահության դերը։
«Կցանկանայի Ձեզ հետ կիսվել որոշ տեղեկություններով և քննարկել այդ հարցը նույնպես»,–իր խոսքն ամփոփել է Փաշինյանը։
Հիշեցնենք, որ ՀՀ վարչապետ Նիկոլ Փաշինյանն այսօր աշխատանքային այցով մեկնել է Ռուսաստանի Դաշնություն: Նա մասնակցել է ՀԱՊԿ անդամ պետությունների առաջնորդների հանդիպմանը: