ԵՐԵՎԱՆ, 14 մայիսի – Sputnik. ՀՀ վարչապետ Նիկոլ Փաշինյանըծանոթացել է Երևան-Սևան ճանապարհահատվածում գտնվող «Անվերջության ժապավեն» և «Արձագանք» արձանների վերականգնման և տարածքների բարեկարգման աշխատանքներին:
Ինչպես հայտնում են կառավարության մամուլի ծառայությունից, 2 արձանների վերականգնման համար պետական բյուջեից հատկացվել է, համապատասխանաբար՝ 178 և 62,5 մլն դրամ:
Փաշինյանը կարևորել է արձանների և նրանց հարակից տարածքների պատշաճ պահպանությունը վերահսկելը: Ընդգծվել է, որ պատմամշակութային հուշարձանների վերականգնման աշխատանքները մնալու են կառավարության ուշադրության ներքո:
Նիկոլ Փաշինյանը ծանոթացել է «Անվերջության ժապավեն» և «Արձագանք» արձանների վերականգնման ընթացքին։
Հիշեցնենք` մարտի 17-ին ՀՀ ԿԳՄՍ նախարար Վահրամ Դումանյանը կառավարության նիստում հայտնել էր, որ «Անվերջության ժապավեն» արձանի վերականգնման աշխատանքներն ավարտված են, բայց տարածքի լուսավորման համար անհրաժեշտ է ևս 7 մլն 65 հազար դրամ։
Փաշինյանը հիշեցրել էր, որ կառավարությունն արդեն 175 մլն դրամ է տրամադրել արձանի վերականգնման համար, բայց պարզվում է` նախագիծը թերի է եղել, իր խոսքով` գիշերային ժամերին արձանն ուղղակի չկա։
«Մեր մեծագույն պրոբլեմը, որ ամեն քայլափոխի մեզ հետապնդում է, կիսակատարության կուլտուրան է, երբ որ մենք կառուցում ենք, հետո ևս 20 տարի շուշաբանդը, բալկոնը, էս առաջ տանում, էն առաջ տանում ու ի վերջո ստանում ենք տձև մի բան»,- ասել է Փաշինյանը` կառավարության անդամներին հրահանգելով դուրս գալ կիսակատարության ռեժիմից ու ցանկացած նախագիծ ներկայացնել ամբողջական միջավայրով։
Քանդակագործ Դավիթ Բեջանյանի «Հավերժության ժապավեն» կամ «Ճանապարհաշինարարներ» արձանի թալանվելու մասին կառավարության մակարդակով հայտարարվեց 2019թ-ին, երբ որոշվեց այն վերականգնել պետության հաշվին։
Տարիների թալանից հետո ճանապարհի եզրին երբեմնի արձանի մասին այդ ժամանակ հիշեցնում էր միայն պատվանդանի վրա մնացած մետաղական կոնստրուկցիան։
2 տարի անց պարզվեց, որ արձանի վերականգնման ընթացքում ևս պղնձի գողության դեպքեր են արձանագրվել։ Այս մասին 2021թ-ին հայտարարել է վարչապետ Փաշինյանը` պատասխանատու մարմինների ուշադրությունը հրավիրելով խնդրի վրա։