Վաղը երթեր ու ընդդիմության հանրահավաքներ չեն լինելու. Սաղաթելյանն ասաց` ինչ է լինելու

ԵՐԵՎԱՆ, 13 մայիսի – Sputnik. «Դիմադրություն» շարժման անդամ, ՀՀ ԱԺ փոխխոսնակ Իշխան Սաղաթելյանը քիչ առաջ Երևանի Ֆրանսիայի հրապարակում հայտարարեց, որ վաղը` մայիսի 14–ին, երթեր ու ընդդիմության հանրահավաքներ չեն լինելու։

Փոխարենը ժամը 14.00-ին Ֆրանսիայի հրապարակում տեղի կունենա Իշխան Սաղաթելյանի մամուլի ասուլիսը։

Իսկ մայիսի 15–ին` ժամը 18.00-ին կմեկնարկի համահայկական մեծ հանրահավաքը։

Նշենք, որ հանրահավաքի մասնակիցների համար «Դիմադրություն» շարժման անդամ Աշոտ Մինասյանը մի քանի նրբություններ բացատրեց, որպեսզի շարժումը մեծ տարածում գտնի նաև սոցցանցերում։

Ստեղծվել է #liveara տելեգրամ ալիքը, որին կարող են միանալ բոլոր ցանկացողները և հետևել շարժման հետ կապված բոլոր մանրամասներին։ Բացի այդ Մինասյանը հորդորեց «Ֆեյսբուքում» ավելի ակտիվ լինել և ամեն օր ուղիղ եթեր մտնել, պարտադիր օգտագործել #liveara, #haymna հեշթեգերը, որպեսզի բոլոր մասնակիցները կարողանան մեկը մյուսի հրապարակումները գտնել։

Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։

Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։

Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։

Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։