ԵՐԵՎԱՆ, 13 մայիսի – Sputnik. ՀՀ մարդու իրավունքների պաշտպան Քրիստինե Գրիգորյանն Ագրարային համալսարանի դասախոս Էմմա Սարգսյանի ձերբակալման հետ կապված պարզաբանում է պահանջել իրավապահ մարմնից։ Նա այդ մասին լրագրողներին հայտնեց կառավարության նիստից հետո։
Նշենք, որ իրավապաշտպան Ռուբեն Մելիքյանը հայտնել էր, որ ձերբակալել են Էմմա Սարգսյանին, որը միայնակ մայր է, նրա անչափահաս դուստրը մնացել է մեն-մենակ։
«Տեղյակ եմ դեպքի մասին և հետևում եմ գործընթացներին։ Պարզաբանումներ ենք պահանջել իրավապահ մարմնից, որը նախաքննություն է իրականացնում։ Նախ պետք է պարզաբանումները ստանանաք, որից հետո կկարողանանք եզրակացություններ անել»,–ասաց Քրիստինե Գրիգորյանը։
Հիշեցնենք, որ ՔԿ–ն հաղորդագրություն էր տարածել` ասելով, որ ենթադրյալ հանցագործությունը կատարած անձինք քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին առաջարկել են 2000 ուսանողի հավաքներին ներգրավելու դիմաց տրամադրել 2 միլիոն դրամ:
ՔԿ–ն նաև համացանցում շրջանառվող ձայնագրություն էր հրապարակել, որի վրա Էմմա Սարգսյանի լուսանկարն էր։ Նշենք, որ այս գործով ձերբակալվել է նաև «5165» շարժման անդամ Ավետիք Չալաբյանը։