Թուրքիան ու Հունաստանը մեկ դաշինքի՝ ՆԱՏՕ-ի անդամներ են, նրանց լարված հարաբերություններն առեղծված են, բայց ՆԱՏՕ-ն թույլ չի տա, որ իր դաշինքի ներսում երկու երկրների միջև ռազմական գործողություններ լինեն։ Sputnik Արմենիայի եթերում նման տեսակետ հայտնեց թուրքագետ Մհեր Աբրահամյանը՝ անդրադառնալով Հունաստանի սահմանին Թուրքիայի սկսած զորավարժությանը։
Թուրքագետի խոսքով՝ այս երկու երկրների հարաբերություններում լարվածությունը միշտ աճում կամ նվազում է, ըստ այդմ, Էգեյան ծովում Թուրքիայի սկսած զորավարժությունն էլ կարող է ուժի ցուցադրում լինել, որովհետև օրակարգում միշտ սուր հարցեր կան։
«Դրանցից է չճանաչված «Կիպրոսի թուրքական հանրապետության» հարցը։ Քանի որ Ռուսաստանը ճանաչեց Լուգանսկի և Դոնեցկի Ժողովրդական Հանրապետությունները, ու դրան են ձգտում բոլոր չճանաչված պետությունները, Թուրքիան ջանում է հասնել նրան, որ աշխարհը ճանաչի «Կիպրոսի թուրքական հանրապետությունը» որպես առանձին պետություն»,- նշեց Աբրահամյանը։
Հունաստանն էլ անհանգստացած է Կիպրոսի խնդրով, քանի որ, Աբրահամյանի դիտարկմամբ, հետագայում այդպիսի խնդիր լինելու է նաև հունական այլ տարածքների հետ, որոնք հարում են թուրքական պետությանը։
Վերջին շրջանում Թուրքիայում իրավիճակը ներկայացնում են այնպես, որ Հունաստանի հետ, ինչպես Հայաստանի դեպքում, հարաբերությունների կարգավորման փուլ է սկսել, տարբեր փոխայցեր ու հայտարարություններ են եղել այս ընթացքում։
Աբրահամյանը նշեց, որ այդ փոխայցերն ու կարգավորման մասին հայտարարությունները Թուրքիայի, այսպես կոչված, փափուկ ուժի հետևանքն են։
«Թուրքիան իր արտաքին քաղաքականությունում որդեգրել է փափուկ ուժի գաղափարախոսությունը։ Նույնն է նաև Հայաստանի դեպքում․ սկսած 90-ականներից նա ցույց է տալիս փափուկ ուժ, այնուհետ անցնում կոշտի։ Հունաստանի հետ նույն քաղաքականությունն է օգտագործում»,- նշեց թուրքագետը։
Նա նաև բացատրեց, որ Հունաստանի դեպքում այդ փափուկ ուժն ավելի արդյունավետ է աշխատում, քանի որ Հունաստանն ինչքան էլ Թուրքիայի հետ խնդիրներ ունենա՝ չունի այն գլոբալ մեծ խնդիրը, որն ունի Հայաստանը։
Հիշեցնենք, որ մայիսի 12-ին Թուրքիան Հունաստանի հետ սահմանին սկսել է «Ծովային առյուծ-2022» զորավարժությունների ակտիվ փուլը: