«Դիմադրություն» շարժման մասնակիցները բացեցին կառավարության երրորդ մասնաշենքի մուտքերը

ԵՐԵՎԱՆ, 13 մայիսի – Sputnik. «Դիմադրություն» շարժման մասնակիցները բացեցին ՀՀ կառավարության երրորդ մասնաշենքի մուտքերը։

Հայտնել ենք, որ ակցիայի մասնակիցները 1 ժամից ավել է` շրջափակել էին շենքը։

Շարժման անդամ Իշխան Սաղաթելյանը նշեց, որ երթով կշարժվեն դեպի Ֆրանսիայի հրապարակ, որտեղ կխոսեն վաղվա անելիքների մասին։

Այժմ ակցիայի մասնակիցները երթով դեպի Ֆրանսիայի հրապարակ են շարժվում։

Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։

Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։

Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։

Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։