ԵՐԵՎԱՆ, 12 մայիսի – Sputnik. Ռուսաստանի և ՆԱՏՕ-ի ուղիղ բախումից խուսափում են բոլորը, միևնույն ժամանակ Ռուսաստանը պատրաստ է վճռական պատասխան տալ ցանկացած մեկին, ով կփորձի մտնել Ուկրաինայում իրականացվող հատուկ գործողության մեջ։ Այս հայտարարությունն արել է ՌԴ նախագահի մամուլի քարտուղար Դմիտրի Պեսկովը։
«Բոլորն ուզում են խուսափել Ռուսաստանի և ՆԱՏՕ-ի ուղիղ բախումից, այդ թվում` Ռուսաստանը։ Այդ մասին բազմաթիվ հայտարարություններ են արել նաև ՆԱՏՕ-ում, և, իմ կարծիքով, ամենակարևորը՝ Վաշինգտոնում, այդ թվում՝ բարձր մակարդակով։ Նման հայտարարություններ է արել նախագահ Բայդենը», - ասել է նա։
Պեսկովն ընդգծել է, որ ռուսական կողմը հիմք է ընդունում այն հայտարարությունները, որոնք փետրվարի 24-ից սկսած` հնչեցրել է նախագահը։
«Հայտարարվել է, որ Ռուսաստանը պատրաստ է ամենավճռական պատասխանը տալ նրան, ով կփորձի ինչ-որ կերպ մտնել Ուկրաինա և ընդգրկվել հատուկ ռազմական գործողության մեջ, որն այժմ իրականացնում է ՌԴ ԶՈւ–ն», - ասել է նա:
Պեսկովն անդրադարձել է նաև Ֆինլանդիայի` ՆԱՏՕ-ին անդամակցելու հեռանկարին: Նրա խոսքով՝ դա կստիպի Ռուսաստանին միջոցներ ձեռնարկել իր անվտանգությունը պաշտպանելու համար։
«Եթե հիշում եք, կա նախագահի և գլխավոր հրամանատարի գործող հանձնարարականը՝ մշակել մեր արևմտյան թևերի ամրապնդման միջոցառումների ցանկ՝ կապված ՆԱՏՕ-ի արևելյան թևի ամրապնդման հետ, այսինքն՝ ՆԱՏՕ-ն մեր կողմ է շարժվում։ Այդ պատճառով, իհարկե, այս ամենը հատուկ վերլուծության և անհրաժեշտ միջոցների մշակման տարր կդառնա իրավիճակը հավասարակշռելու և մեր անվտանգությունն ապահովելու համար», - ասել է Պեսկովը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 78-րդ օրը։