ԵՐԵՎԱՆ, 12 մայիսի – Sputnik. ՀՅԴ անդամ, ԱԺ «Հայաստան» խմբակցության պատգամավոր Արծվիկ Մինասյանը, ելույթ ունենալով Երևանի Ֆրանսիայի հրապարակում ընթացող հանրահավաքին, ասաց, որ իշխանությունը փորձում է կոտրել ընդդիմադիրների ոգին։
«Գիտեք, որ խուզարկել են ՀՅԴ-ական Սուրեն Մանուկյանի տունը, ուզում էին ընտրակաշառք գտնել։ Դաշնակցականի տանը ամեն ինչ կգտնեք բացի ընտրակաշառքից։ Նման քայլերով չեք կարող կոտրել մեր ոգին», - ասաց նա։
ՀՅԴ անդամի վստահեցմամբ՝ Գյումրիում տարեցներին ծեծելու միջադեպն ուռճացված է, ընդդիմադիր երիտասարդները հարգում են տարեցներին։
«Այս պայքարին միացած բոլոր երիտասարդները հարգում են տարեցներին։ Հիմա ապատեղեկատվության քարոզ է գնում՝ այդ թվում և Հ1-ով», - ասաց նա։
Մինասյանն անդրադարձավ նաև ձերբակալված ինը երիտասարդներին, որոնց կալանավորման մասին որոշում պետք է կայացվի։ Նա ասաց, որ նրանց շարքերում է ՀՅԴ-ական Գեղամ Մանուկյանի որդի Տարոն Մանուկյանը և Նիդեռլանդներից հատուկ հանրահավաքների համար ժամանած մի երիտասարդ։
Նշենք, որ մայիսի 8-ին ընդդիմության կողմից կազմակերպած ավտոերթի ընթացքում, Գյումրի քաղաքի Երևանյան խճուղում կանգնած քաղաքացիների և հիշյալ ավտոերթի մասնակիցների միջև տեղի է ունեցել վիճաբանություն։
Պարզվել է, որ մի խումբ երիտասարդներ, իջնելով ավտոմեքենայից, մոտեցել են հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին:
Դեպքի առթիվ ՀՀ քրեական օրենսգրքի 258-րդ հոդվածի (խուլիգանություն) 4-րդ մասով հարուցվել է քրեական գործ: Նախաքննության ընթացքում պարզվել է տուժած տղամարդկանց ինքնությունը, որոնք 74, 56, 72 և 84 տարեկան քաղաքացիներ են: