ԵՐԵՎԱՆ, 12 մայիսի – Sputnik. Հասարակական գործիչ, Երևանի բնակիչ Ավետիք Չալաբյանը ձերբակալվել է Հայաստանի ազգային ագրարային համալսարանի ուսանողներին ընդդիմության ցույցերին մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու կասկածանքով, հայտնում են ՀՀ քննչական կոմիտեից։
Այս գործով Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 163-րդ հոդվածի 3-րդ մասի 2-րդ կետի հատկանիշներով (երթերին կամ ցույցերին մասնակցելուն բռնություն գործադրելով կամ դա գործադրելու սպառնալիքով հարկադրելը) հարուցվել է քրեական գործ։
Նշվում է, որ հիշյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին» վերտառությամբ:
Կատարված նախաքննությամբ, ըստ ՔԿ-ի՝ պարզվել է, որ ենթադրյալ հանցագործությունը կատարած անձինք քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:
Կատարվում են անհրաժեշտ քննչական և դատավարական այլ գործողություններ՝ դեպքի բոլոր հանգամանքները պարզելու ուղղությամբ:
Հայտնել ենք, որ Ոստիկանությունը խուզարկել է հասարակական գործիչ Ավետիք Չալաբյանի տունը և բերման ենթարկել նրան։ Չալաբյանի պաշտպան Արթուր Հարությունյանը Sputnik Արմենիային ասել է, որ Չալաբյանին բերման ենթարկելն ապօրինի է։
Նշենք, որ վերջին օրերին Երևանում ընթացող ընդդիմության բողոքի ցույցերի ֆոնին խուզարկության են ենթարկվել նաև ՀՅԴ որոշ անդամների տներն ու ՀՅԴ Արմավիրի մարզի մարզային գրասենյակները։ ՀՅԴ 2 անդամի կալանավորել են։
Այսօր հայտնի դարձավ, որ խուզարկություն է իրականացվել նաև ՀՅԴ ԳՄ անդամ Սուրեն Մանուկյանի տանը։